Муҳаммад Солиҳ… Мен учун бу киши сиёсатчи ё бирор доҳийнинг рақиби эмас балки шоир сифатида жуда қадрлидир. Истамбулда бўлганимда кўришгандик. Қарийб икки соат суҳбатлашган бўлсак фақат ижод, шеърият, Ватан соғинчи хақида суҳбатлашгандик. Ўзбекистонни жуда-жуда соғинишлари кўзларидан, сўзларидан билинарди. Менга шеърий китобларини совға қилгандилар.

Афсуски Ватанга олиб келолмадим Истамбулга ташлаб келдим… Ўлмасам қачондир шу китобларни ўз Ватанимда мазза қилиб роҳатланиб ўқиш насиб қилишига ишонаман… Бир эски китоблари хам бор экан. Сўрасам йўқ бу менда ўзи битта деб бермадилар. Мен эса ўғирлаб олувдим???? Бундай буюк шоир билан кўришиш хар қачон хам насиб этавермайди ахир.

Мендан кўпинча нега Ёзувчилар Уюшмасига бормайсан деб сўрашади. Кимнинг олдига бораман ахир? Муҳаммад Солиҳ-Истамбулда, Хуршид Даврон ва Усмон Азимни уюшмадан топиш амримаҳол. Абдулла Орипов ва Эркин Воҳидов вафот этиб кетишди…

Менга алам қилади Устоз деб билганларимни бемалол тилга ола билмаслик тўйиб суҳбатлашолмаслик… Муҳаммад Солиҳ Ватанга ё халққа нима ёмонлик қилди ахир? Унинг хам ўғли, қизи, бор. Иккиси жам бўлиб миллиардлаб пул ўмардими, тадбиркорларни қаматдими нима қилди тушунмайман тушуна олмайман.

Ўз вақтида Нуруллоҳ Муҳаммад Рауфхон оғамни қачондир Ватанда яна кўриш насиб қилишини Аллоҳдан сўрагандим. Амалга ошди. Чунки дуо қилиб ёлборган биргина мен эмасдим. Бу сафар хам дуода бўламан.

ИншаАллоҳ, Муҳаммад оғани хам Ватанда кўриш насиб қилади…

Ўз вақтида Солженицын, Бродский хам ўз Ватани Россияни ташлаб кетишга мажбур бўлишган. Ўз даврининг хукумати уларни душман деб эълон қилган.

Аммо кейинчалик бу икки ижодкор рус адабиётининг фахрига айланди. Қарангки улар хоин эмас эканлар… Тарих эса такрорланиб туради. Мен Ўзбекистонда зулм кўрганим йўқ. Йигирма саккиз йилки шу Ватанда нон еяпман.

Эътиқодимгада шеъриятимгада биров халигача дахл қилмаган. Шунга кўра мендан кўра шу Ватанда яйраб яшашга хаққи кўпроқ ўзбек шоирини хурмат қилишимга, ижодини севишимга, монеълик қилмайдилар деб умид қиламан. Зеро чин ижодкорнинг ижоди сарҳадларни, тўсиқу тақиқларни, керак бўлса орадан йиллар ўтганинида писанд қилмайди, ўлмасдан яшайверади.

Забардаст Устоз шоир, умрингиз узун ва хайрли бўлсин!

Ватанда тинчлик-омонликда кўришайлик.

Шеъриятингиз муҳлиси

Абдурроҳман Мешаян