Русиянинг энг машҳур бойларидан Алишер Усмоновнинг автомобиль ҳалокатида вафот этган жияни Бобур Усмановнинг дафн қилиниши ва бу ҳақда расмий баёнотнинг йўқлиги Тошкентда турли миш -мишлар ва гумонларга сабаб бўлмоқда.

Бобур Усманов Алишер Усмоновнинг яхши кўрган жияни ва меросхўри бўлган.

Оммавий ахборот воситалари Тошкентдаги йўл транспорт хизматининг исми очиқланишини истамаган ходимига асосланиб, ушбу ҳалокатнинг Тошкент вақти эрталаб соат 5 да шаҳар марказида содир бўлганини хабар берганлар.

Бобурнинг кучли маст бўлган ҳолда ўз дўстининг туғилган кунидан қайтиб келаётганда ҳалок бўлгани ҳақида маълумотлар бор. Унинг ёнида бир ёш қиз ҳам бўлган ва у ҳам ҳалок бўлган.

Бобур Усманов хотини ва қизчаси билан асосан Швейцариида яшаган. У Тошкентга шу йилнинг 10 май кунига мўлжалланган қаридошининг қизи Асал Нарзиеванинг туйига иштирок этиш учун келган.

Яқинда Британиянинг энг бой одами, деб эълон қилинган Алишер Усмоновнинг ўз фанзанди бўлмагани учун у укасининг ўғли Бобурни ўзининг меросхўри сифата танлаган. Бобур Швецарияда молия бўйича таълим олган ва бой амакисининг хориждаги ишларини бошқарган.

Гувоҳларнинг айтишларича, Москвадан Тошкентга шошилинч равишда етиб келган ва дафн маросимида қатнашган Алишер Усмонов фожеадан қаттиқ қайғуга тушган ва қийинчилик билан оёқда турган.

Ўзбекистон ҳукумати бу масалада расмий баёнот бермаган ва афтидан ҳукумат бундай баёнот бермаса ҳам керак.

Алишер Усмонов ҳам жиянинг ўлими тўғрисида баёнот бермаган.

Қариндош -уруғчилик

Расмий маълумотнинг йўқлиги ушбу ҳалокатнинг тасодифий эмаслиги ҳақида турли миш -мишлар ва гумонларни ўртага чиқармоқда.

Воқеа тафсилотлари унинг гувоҳларида эмас, фақат қариндош –уруғларга маълум бўлса керак. Аслида воқеанинг гувоҳлари борми ўзи, деган савол ҳам туғилади.

Тошкент кўчалари эрталаб бўм -бўш бўлади ва эҳтимол Бобур Усмонов машинасини бўш кўчада ҳайдаган бўлса керак. Бобурнинг ёнида ўтирган ёш қиз ҳалокатдан кейин касалхонага келтирилган ва у ерда вужудидаги жароҳатлар туфайли вафот этган.

Бобур Усмонов президенлтикка асосий даъвогарлардан Ўзбекистоннинг ҳозирги Бош Вазири Шавкат Мирзиёевнинг жиянига уйланганди.

Ўзбекистон Президентига яқин манбалар Мирзиёев ва Усмоновнинг қуда андалигидан Каримов ва унинг яқинларининг норози эканлигини таъкидлаганлар.

Русиянинг энг бой одамининг жияни ва Бош Вазирнинг куёвининг фожеали ҳалокати Ўзбекистон Президентининг соғлиги ёмонлашган ва юқори поғонадаги сиёсатчилар ўртасида кураш авжига чиққан вақтда содир бўлган.

Бош Вазир Мирзиёев, унинг ўринбосари Рустам Азимов ва президентинг қизи Гулнора Каримова Ўзбекистон Президентлигига асосий даъвогарлар ҳисобланадилар.

Агарда бу фалокат кўплар ўйлаётгандек буйруқ билан амалга оширилмаган қотиллик эмас, бахтсиз ҳодиса бўлганда ҳам, бу воқеа ўз жиянини меросхўри сифатида тарбиялаган Алишер Усмонов ва оиласи катта фожеага дучор бўлган Бош Вазир учун ҳам катта зарба ҳисобланади. Шунингдек, бу фожеа бундан кейин қариндош –уруғ бўлмай қолган Усмонов ва Мирзиёев муносабатларига ҳам зарба беради.

Тошкентдан воқеага оид жуда кам маълумотлар келиши бу ҳақдаги миш -мишлар ва уйдирмаларни ҳам ортишига сабаб бўлмоқда.

bbc.co.uk