Китоб ноширлиги учун ёмон кунлар бошланаётгани башорат қилинди

“Озодлик” радиосининг хабар беришича, “Академнашр” нашриёти директори Санжар Назар нашриёт ва китоб савдоси хизматлари учун қўшимча қиймат солиғи ва даромад солиғи ошганини ноширлик учун ёмон кунлар келаётгани белгиси, деб атаган (www.sof.uz, 8 январь).

“Матбаа, нашриёт ва китоб савдоси хизматлари учун 15 фоиз миқдорда ҚҚС тўланадиган бўлди. Нашр учун зарур хомашёлар: қоғоз, бўёқ ва ҳоказолар учун олдин ҳам ҚҚС тўланар эди. Корхоналарнинг даромад солиғи миқдори 12 фоиздан 15 фоизга ошди. Аҳолининг тўлов қобилияти, харид қуввати ошиши мумкинлигига ҳатто бирон ишора ҳам кўринмаётган бир шароитда бу ўзгаришларнинг оқибатини тасаввур қилишни ҳам хоҳламасдим”, дейди нашриёт директори С. Назар.

Муаллиф ҚҚС ва даромад солиқларининг ошиши шундоғам зўрға елкасидан нафас олиб турган соҳа учун ортиқча юк эканини таъкидлаган.

“Балки янги Ўзбекистон китобсиз мамлакат бўлиши керакдир?!” дея киноя қилади ношир.

ЎХҲ ахборот бўлими