18 октябрь куни Беларусда авторитар президент Александр Лукашенкога қарши навбатдаги норозилик акциялари бўлиб ўтади.

Беларусда норозилик намойишлари 9 август куни ўтган президентлик сайловида мамлакатни 26 йилдан бери бошқариб келаётган Лукашенко ғолиб бўлгани эълон қилингани ортидан бошланиб кетган эди.

Лукашенконинг сайловдаги асосий рақиби Светлана Тихановская овоз бериш натижалари сохталаштирилганини айтиб, уни тан олишдан бош тортди ва мамлакатни тарк этишга мажбур бўлди.

Жорий ҳафтада Тихановская ва унинг тарафдорлари президент Лукашенкодан 25 октябргача истеъфо беришни талаб қилиб, ультиматум йўлладилар.

Тихановская, бундан ташқари, норозилик намойиши иштирокчиларига нисбатан зўравонликларни тўхтатиш ва барча сиёсий маҳбусларни озод қилишни талаб этди.

Тихановская ўз Telegram каналида бу талаблар бажарилмаса 26 октябрь куни «барча корхоналарда иш ташлаш бошланиши, йўллар тўсиб қўйилиши ва давлат дўконларидан халқ маҳсулот сотиб олмаслиги»дан огоҳлантирди.

АҚШ ва Европа Иттифоқи Лукашенкони президент сифатида тан олмаслигини билдирган.

Манба: ozodlik.org