Қирғизистонда 4 октябрь куни ўтган президентлик сайлови натижаларини тан олишдан бош тортган 12та мухолифат партияси пойтахт Бишкекда ўз митингларини бошлади.

4 октябрь куни сайлов участкалари ёпилиб, натижалар эълон қилиниши биланоқ Бишкек ва Талас шаҳарларида мухолифат тарафдорлари норозилик намойишларига йиғила бошлаганди. Бир неча соатдан сўнг норозилар тарқалиб кетди. Мухолифат 5 октябрда норозилик намойишлари давом этишини билдирди.

5 октябрь куни пойтахт марказига йиғилган қатор партияларнинг юзлаб тарафдорлари “Сайлов натижаларини тан олмаймиз!”, “Қирғизистонга озодлик!”, “Биз қул эмасмиз” каби шиорларни ҳайқирдилар.

Эрталаб маҳаллий вақт билан соат 10да бошланган митингда Социал демократлар, “Реформа”, “Мекен интимағи”, “Чўнг Қазат”, “Ийман нуру” ва “Ўрдў” партиялари тарафдори экани айтилди.

Маҳаллий вақт билан соат 14да Бишкекда “Республика” ва “Ата Мекен” партиялари митинг ўтказишни режалаштирган.

4 октябрда ўтган парламент сайловида амалдаги президентнинг укаси Асилбек Жээнбеков номзоди кўрсатилган “Биримдик” ва коррупцияга аралашгани айтиладиган Раимбек Матраимов оиласига мансуб “Мекеним Қирғизстан” (“Ватаним Қирғизистон”) партияларининг ҳар бири 24 фоиздан кўпроқ овоз олди.

Учинчи ва тўртинчи ўринларни эса “Қирғизстан” ва “Бутун Қирғизстан” партиялари эгаллади. Мазкур тўрт партия 120 депутатдан иборат бўлган Қирғизистон янги парламентини шакллантиради.

Мазкур партиялар ичида фақат “Бутун Қирғизстан” ўзини мухолифат партияси сифатида тақдим этган.

Қирғизистон қонунларига мувофиқ сайловчиларнинг 7 фоиздан кўпроқ овозини олган партиялар ғолиб ҳисобланади. Парламент сайловида 16та сиёсий партия иштирок этди.

Манба: ozodlik.org