Украина ҳудудига ҳеч бир асоссиз бостириб кирган тажовузкор Россиянинг террор армияси бугунги кунга келиб фаол жанговар ҳаракатлар ўтказишга қурби етмай қолгани боис оператив танаффус қилишга мажбур бўлиб қолган. Ўрис армияси айни дамда етган жойида қотиб қолган бўлиб, қўшилма ва бирлашмаларнинг омон қолган парчаларини йиғиб, қайта тизиш мақсадида бирор ерга кўчиб ўтишга уриниши қайд этилмаган.

Украина Қуролли Кучлари эса, аксинча, фронтнинг айрим йўналишларида ўрис босқинчиларига қарата зарба берганча, эришилган муваффақиятни ривожлантириб, мустаҳкамлаш билан шуғулланмоқда.
Жумладан, кеча Гостомель, Буча ва Ирпень орасида қуршовга олинган ўрис газандаларининг қуршов ҳалқасини ёриб ўтиш ниятида уюштирган 9 та уринишини қайтариш баробарида, 12 та танки, 20 та зирҳли ва автомобиль техникаси, 9 та артиллерия тизимини йўқ қилиб, 200 кишидан зиёд ҳарбий хизматчисини ер тишлатди. Украина осмонига кириб келган 2 та ўрис самолёти билан учувчисиз бошқариладиган учиш аппаратини уриб йиқитди. Ирпень йўналишида кечган жангларда Грузиядан келган кўнгиллилар бўлинмаси алоҳида жонбозлик кўрсатди. Мазкур жанговар ҳаракатларда душмандан муқаддам ўлжа олинган ҳужумкор қурол-аслаҳа тизимлари жуда асқатди.
Украина Қуролли Кучлари Қуруқликдаги қўшинлар штаби бошлиғиининг ўринбосари Александ Грузевич томонидан берилган хабарга кўра, ўтказилган ушбу жанглар натижасида Ирпендаги жанговар вазият ҳисобга олинмаганда, пойтахт Киев атрофи энди батамом Украина Қуролли Кучларининг назорати остига ўтди.
Айни пайтда Сума вилоятининг Тростянец шаҳрини ўрис қабоҳатидан тозалаш тадбирлари ўтказилмоқда. Херсон шаҳрида эса кўча жанглари кечмоқда. Ҳадемай, Херсон ҳам Украина Қуролли Кучлари назоратига ўтиб қолиши мумкин.

Эсингизда бўлса, кечаги мақоламда бадбахт Путиннинг йиғиб-терган ҳарбий техникаси Қримдан Херсонга ўтар экан, ажал фариштаси макон қурган Чернобаевка аэродромида украин артиллериячилари томонидан йўқ қилиб ташлангани, афтидан, Чернобаевка аэродромига йиғилган қўшин туркумини бошқарган йирик саркарда ўз штаби билан бирга ер тишлагани туфайли бебош қолган кўплаб бўлинмалар Антонов кўпригидан Қримга қараб қочиб кетишгани ҳақида ёзган эдим.
Дарҳақиқат, ушбу тахмин бугун ўз тасдигини топди. Олинган маълумотларга қараганда, Чернобаевка аэродромида барпо этилган қўмондонлик пунктига қарата берилган зарба натижасида Путиннинг яна бир генерали, бу сафар Жанубий ҳарбий округ тасарруфидаги 49- умумқўшин армия қўмондони генерал-лейтенант Яков Резанцев ўз штаби билан бирга асфаласофилинга йўл олди.
Бунда, Украина заминига Россия Федерацияси Ғарбий ҳарбий округи тасарруфидаги, Мурманскнинг Норвегияга яқин аҳоли пунктида жойлашган 200- мотоўқчи бригада таркибида келган 648 нафар ўрисдан 645 нафари ўз генералига қўшилиб ўлим топди. Мазкур бригада 1997 йили тузилган бўлиб, Арктика учун кечиши мумкин бўлган жангларда қўллаш мақсадида атайин тайёрланган. Келгусида ушбу бригада негизида «Арктика дивизияси» тузилиши кўзда тутилган… эди.

Путин Украина фронтида қирилиб кетаётган ўз босқинчилари ўрнига одам топиш масаласида катта қийинчилик сезмоқда. Мавжуд бўлинмалар шахсий таркибининг маънавий-руҳий ҳолати аянчли даражага келиб қолган. Бундай бўлинмаларда хизмат ўтаётган ҳарбий хизматчилар орасида жанг қилишдан бош тортиш ҳолатлари кузатилмоқда. Хусусан, 7- десант-ҳужумкор дивизия таркибидаги полклардан бирида ҳарбий хизмат ўтаётган аскарларнинг 50 фоизи Украинада кечаётган жанговар ҳаракатларда иштирок этишдан бош тортиб, билдирув тақдим этишди. Мелитополни эгаллаб турган ўрис бўлинмаларининг 70 нафар ҳарбий хизматчиси эса қуролли исён кўтариб, келгуси жанговар ҳаракатларда иштирок этишдан бош тортишди.
Михаил исмли ўрис танкчиси Украина Хавфсизлик хизматига қўнғироқ қилиб, ўз танкини Украина ҳукумати томонидан ваъда қилинган 10000 долларга сотишга аҳд қилганини маълум қилди. Учрашув жойини келишиб олгач, чиндан ҳам ўз танкини бус-бутун ҳолатда топширди. Ваъда қилинган пулни у, уруш тугагач, олади.

Россия армиясининг офицерларидан бири эса ўз қўл остидаги ротаси олдига ўрисбоши Путиннинг ғайриқонуний буйруғини бажаришни давом этиш ёки бош тортиш масаласини қўйди. Шахсий таркиб Украина Қуролли Кучлари томонига ўтиб кетиш қарорини бир овоздан мақул топди. Шундан сўнг офицер Украина Хавфсизлик хизматига қўнғироқ қилиб, бор гапни айтиб берди.
Украина Қуролли Кучлари томонига ўтган ушбу офицер айни дамда радиоалоқа орқали Россия армияси ҳарбий хизматчиларига мурожаат қилиб, Россияни Путин режимидан халос қилиш мақсадида тузилган «Свободная Россия» легиони сафига қўшилишга даъват этмоқда. Дарҳақиқат, Украинадан юртига ўлмай қайтадиган ўрис ҳарбийларида Путинга берадиган саволлари тўпланиб қолган.

Ўхшаш ҳолатларнинг юзага келишига Россия Федерацияси Мудофаа вазирлиги тасарруфидаги ҳарбий қисмларни молиялаштириш тизимида кузатилаётган муаммолар ҳам сабаб бўлмоқда. Чунки ҳарбий истихборот маълумотларига қараганда, Россия бюджетида Украинадаги уруш иштирокчиларига хизмат сафари учун пул тўлаш харажатлари кўзда тутилмаган экан. Ушбу муаммо хусусий ҳарбий компанияларга ҳам дахл қилган. Шу боис кўплаб ёлланма жанггарилар шартномада кўзда тутилган молиявий шартлар Россия ҳукумати томонидан бажарилмаётгани сабабли жанг қилишдан бош тортишган.

Путин Тинч океан флотидан 1,5 минг денгиз пиёдаларини, Арманистоннинг Гумрисидаги ҳарбий базадан 800 нафар жангчини, Озарбайжоннинг Тоғли Қарабоғидаги Тинчлик ўрнатиш контингентидан 2000 кишини аранг йиға билди. Россияда ўтказган яширин сафарбарлик тадбирлари иш бермади. Энди Путин юрт военкоматларига кўрсатма бериб, жанговар ҳаракатларда муқаддам иштирок этган фуқароларни топиб, шартнима тузганча, Украинага жўнатиш вазифасини қўйган.

Хўп, Путин бир амллаб одам топди дейлик. Бироқ бу билан иш битмайди-ю. Бўлғуси бўлинмалар жанговар техника билан ҳам таъминлаши керакку. Бу масала ҳам ҳозир Путиннинг олдида турган, ечими топилмас ниҳоятда катта муаммолардан бирига айланиб қолган.

– Нега энди муаммо бўлар экан? Путиннинг жанговар техникаси тиқилиб ётибди, ўртоқ подполковник! – дея эътироз билдиришлари мумкин менга, айрим россияпараст лақма юртдошларимиз.

Уларнинг эътирозларига мен сал кейинроқ жавоб бериб, Путин ушбу муаммони ҳаётда ҳал эта олмаслигини асослаб ўтаман. Ҳозир эса мен Путиннинг урушга жўнатгани одам топиш йўлидаги саъй-ҳаракатлари билан боғлиқ масалани охирига етказмоқчиман. Бунда, гап, Белорусь армияси ҳақида боради.

Шубҳа йўқки, Украина жанггоҳларида кечаётган ҳарбий ҳаракатларни диққат билан кузатиб бораётган кўпчилик юртдошларимизни Белорусь армиясининг Россия томонидан Украинага қарши бошланган урушда бевосита иштирок этиш этмаслик масаласи қизиқтиради. Мазкур масала, тўғрисини айтганда, айни дамда мубҳам бўлганча қолмоқда.

Илоннинг ёғини ялаган, ўзини Белорусь Республикаси президенти деб биладиган Лукашенко исмли қари тулки думини у ёқ, бу ёқ ташлаганча, латта чайнаяпти, ўз қўшинига Украина ҳудудига бостириб кириш буйруғини бермаяпти. Бу билан у ўз президентлик курсисини сақлаб турибди.
Бироқ ҳар икки ҳолатдда ҳам Лукашенко режими узоққа бормайди. Нима учун?

Чунки:
– биринчи ҳолатда, яъни Украинага қарши уруш бошлашдан бош тортадиган бўлса, турган гапки, халқаро жиноятчи Путин Лукашенкога нисбатан кескин чора кўришдан – ўзининг махсус каллакесар бўлинмаларини юбориб, жисмонан йўқ қилиб юборишдан тап тортмайди;

– ккинчи ҳолатда, яъни ўз қўшинини Украина ҳудудига киритадиган бўлса, Белорусь халқи пайтдан фойдаланиб, ситамгар қаллобни тахтдан ағдариб ташлайди. Чунки белоруслар, маълумингиз бўлсинки, ўз армиясидан нафратланади! Зеро, Белорусь армияси норозилик намойишларини аёвсиз янчиб ташлашда Лукашенкога бевосита ёрдам берган, минглаб одамларни аёвсиз калтаклаб, зиндонда чиритган ва бу билан ғайриқонуний режимнинг тантанасини таъминлаган. Шунинг учун ҳам Белорусь халқи ўз ҳарбийларини жуда ёмон кўради. Лукашенконинг армияси Украинага кириб кетганча, қайтиб чиқмаслигини яхши билган халқ, эътибор берган бўлсангиз, Белорусь қўшинларининг урушда иштирок этишига қаршилик кўрсатишмаяпти.

Лукашенконинг ихтиёрида тахминан 12 та батальон-тактик гуруҳлар, яъни 20 мингтача ҳарбий хизматчи бор. Путин ўз жанговар техникасига эга айнан мана шу кучга айни дамда катта эҳтиёж сезмоқда. Бироқ олинган маълумотларга қараганда, Белорусь армияси ҳарбий хизматчилари Путиннинг жиноий мазмунга эга ғоялари учун бекордан-бекор ўлиб кетишни исташмаяпти. Боз устига, Белорусь ҳарбийлари босқинчи ўрисларнинг украин халқи томонидан қай кўйга солиб қиратилаётганини, жанг майдонидан узатилаётган даҳшатли манзараларни, юрт ўликхоналари ўриснинг 2,5 мингдан зиёд мурдасига тўлиб, жой етмай қолаётганини, касалхоналарда ётган майиб-мажруҳ ўрисларнинг оғриқдан дод солаётганини ўз кўзлари билан кўришмоқда.
Бу ҳам камлик қилгандек, Белорусь армияси ҳарбийлари ўрисларнинг Украина ҳудудидан тортиб келинаётган жанговар техникасини ўрис қонидан, одам танасининг ички ва ташқи аъзоридан тозалаб ювиш ишларига жалб этилмоқда.
Буларнинг бари, табиийки, умрида порох ҳидламаган белорусь жангчиларига оғир маънавий-руҳий таъсир ўтказиб, Украина ҳудудига бостириб киришдан, ўз пешанасига даҳшатли қисмат ёздиришдан бош тортишмоқда.

Бир сўз билан айтганда, Лукашенконинг гум бўлишидан сўзсиз итоат талаб қилаётган Путин ҳам, урушда иштирок этишни истамаётган Белорусь армияси ҳам, дардини ичига ютиб юрган Белорусь халқи ҳам манфаатдор. Буларнинг барини айёр кети ила жуда яхши ҳис этаётган Лукошенко айни дамда пойтахт Минск шаҳри атрофига, унинг ўша сезгир кетини ҳимоя қиладиган махсус бўлинмалар, миллий гвардия ва полиция бўлинмаларининг йирик сонини йиғиб олган. Қари автократга жон ширин кўринмоқда.

Мана энди айрим россияпараст лақма юртдошларимизнинг эҳтимолий қатъий ишончи – Путин ихтиёрида «тиқилиб ётган» жанговар техника турлари ҳақида фикр юритамиз.

Уруш эълон қилиш арафасида Россия Федерацияси мудофаа вазири армия генерали Сергей Шойгу Россия Федерацияси қуролли кучлари олий бош қўмондони Владимир Путинга Мудофаа вазирлиги тасарруфидаги жанговар техниканинг 70 фоизи модернизация қилингани, қолган 30 фоизи эса яп-янги техника эканлиги ҳақида билдирув берди.
Бироқ узоғи билан 3 – 4 кун давом этиши керак бўлган, лекин негадир, мана бир ойдирки, аччиқ ичакдай чўзилиб кетган «махсус ҳарбий операция», ўзига ҳаддан ортиқ бино қўйиб юборган Шойгунинг Путинга тақдим этган билдируви ғирт ёлғон эканлигини, давлат бюджетидан мудофаа манфаатларига, шу жумладан, жанговар техника турларини модернизация қилишга ажратилган миллиард-миллиард рубллар Россия қуролли кучларида гуркираган коррупция ва талон-торож ботқоғига ботиб кетганини яққол кўрсатиб қўйди.

Россия Федерацияси қуролли кучларининг Украина ҳудудига кириб келган жанговар техникаси аслида ғирт пашмак эканлигини ҳамма кўриб турибди. Ўғри ўриснинг ихтиёрида борки ҳарбий техникаси: «модернизация қилинган», яп-янги ва ҳатто парадда ўтадиган ялтироқ техникаси, ҳатто ягона нусхада ясалган, бирорта ўқ узишга улгурмай, ёндириб юборилган «Қора бургут» танки ҳам Украина заминига киритилди.

Хўш, натижа нима бўлди?
Ўрис техникасининг аксарияти ишламай, йўлда бузилиб, жанговар техника колонналари резинадай чўзилиб, Украина дронлари-ю, артиллерия тизимларига ем бўлди. Ўз тракторига эга украин дехқонлари эса Шойгунинг анча-мунча «модернизация қилинган» жанговар техникасини тумшуғи остидан тортиб кетиб, юрт Қуролли Кучларига топширишди. Кеча бир украин қарияси ўрисларнинг борти ўқ-дори яшикларига тўла юк ташиш машинасини олиб қочиб, маҳаллий Ҳудудий мудофаа бўлинмасига элтиб берди.
Ҳой, ўрис, бутун дунё кўриб ўтирибди-ю, буни! Ўл-а, шарманда!

Ҳеч қандай динамик муҳофазага эга бўлмаган, ўтган асрнинг 70- йилларида ишлаб чиқарилган Т-72 русумли, шунингдек, 60-йилларда ишлаб чиқарилган Т-62 русумли танклар ҳам жанг майдонида учраб турибди. Бу ҳам майли, фақат 76 навли бензинда юрадиган, бугунги кунда кенг тарқалган бензин навлари қуйиладиган бўлса, куйиб, ишдан чиқадиган ГАЗ-51 русумли машина двигатели ўрнатилган БТР-60 русумли зирҳли транспортёрлар ҳам учраб турибди.

Кези келганда таъкидлаб ўтмоқ жоизки, Белорусь армияси тасарруфидаги жанговар техниканинг аҳволи бундан баттар бўлса бордирки, яхши эмас. Белорусь қўшини Украина чегарасини бузиб ўтиб, Волин вилоятига кирса бас. У ерлик халқ азалдан жанг қилиш масаласида устаси фаранг. Бизнинг қаҳрамон боболаримиз ўрис босқинчиларига қарши 1933 йилга қадар жанг қилишган бўлса, Ғарбий Украина халқи 1954 йилга қадар коммунистларга қарши олиб борилган партизанлик ҳаракатини тўхтатмаган.

Россия ОАВ орқали нақадар буюк саркарда эканлигини тинмай пиар қилган, юрти Тувада ўзи учун мисли кўрилмаган кошоналар қурган буғубоқар Шойгунинг Путинга тақдим этган билдирувларига кўра, Мудофаа вазирлигида мавжуд барча техника турлари регламент таъмиридан чиқарилган, захира асбоб ва анжомлар билан тўла-тўкис жиҳозланган, консервация қилишдан олдин двигатели ўт олдирилиб, барча тизимлари атрофлича текширувдан ўтказилган.
Уруш эса, россияпараст лақмаларимизнинг юраги қанчалик эзилмасин, Шойгунинг гаплари ёлғон эканлигини, Путинга тақдим этилган билдирувидаги маълумотлар сохта эканлигини кўрсатди қўйди.

Оддий бир мисол. Россия Федерацияси Ҳарбий-денгиз флоти тасарруфидаги Шимолий флот қўмондонлигига «Кинжал», «Ураган», «Крепость» русумли зенит-ракета комплексларига техник хизмат кўрсатиб, таъмирдан чиқариш ишлари учун давлат бюджетидан 1 млрд рубль ажратилган.
«Коммерсант» нашри томонидан келтирилган маълумотларга қараганда, ушбу маблағдан 700 млн рубли коррупцияга дахлдор шахслар томонидан ғайриқонуний равишда ўзлаштириб юборилган. Мазкур комплексларнинг радиоэлектрон жиҳозларини таъмирлаш ишлари билан шуғулланган корхоналардан бирининг эса бундай ишларни амалга ошириш ҳуқуқини берадиган лицензияси ҳам бўлмаган.
Мана сизга «русский мир»нинг баркамоллиги! Мана сизга «Иймони йўғ-у, инсофи бор»ларнинг асл башараси! Бундай мисолларнинг чеки йўқ. Урушдан кейин ўтказиладиган ўрисча «разборка»ларда ҳали кўп фактлар очилиб келади.

Путин чиндан ҳам боши берк кўчага кириб қолди. Юқорида баён этилган камчилик ва хатоларни бартараф этишга унинг на вақти ва на имкони бор. Уруш бошлаганидагина фош бўлган ушбу муаммоларнинг ечими йўқ, кеч бўлди. Уруш фронтига юборилган қўшинларининг аҳволи ниҳоятда танг. Айниқса, асосий кучлардан 300 – 400 километрга узоқлашиб кетган Киев бўсағасидаги ўрис қўшинининг на егулиги бор, на ёқилғи захираси.
Россиядан Украинага олиб борадиган темир йўл, ўтган мақолаларимда айтиб ўтганимдек, Украинанинг махсус бўлинмаси томонидан портлатиб юборилган. Автомобиль йўлларида қатнаётган ўрис колонналари Украина партизанлари томонидан «муносиб» қарши олинмоқда. Эндигина йўлга қўйилган кема қатнови ҳам Путиннинг шўр пешанасига сиғмади. Чунки кеча украин артиллериячилари Бердянск бандаргоҳига қарата ўт очиб, ундаги кемаларга жиддий шикаст етказди. «Саратов» кемаси эса турган жойида ғарқ бўлиб, бандаргоҳдан фойдаланишга тўсиқлик яратиб қўйди.

Қисқа қилиб айтганда, Украина ҳимоячилари ўриснинг террор армиясини бир четдан, шошмасдан, Путиндан фарқли ўлароқ, ўз ҳарбийлари ва жанговар техникасини авайлаб, маълум тамойилга амал қилганча, моҳирона қириб бормоқда. Путин бир амаллаб топиб-тутиб, фронтга юборган кучлар шу заҳоти жангга киритилмоқда. Ўрис генераллари эса жиддийроқ ҳужум операциясини ўтказиш манфаатларида захира куч йиғишга улгурмаяпти. Колхозча қилиб тушунтирадиган бўлсам, фронтда ўзига хос конвейер шаклланган: Путин бу ёғдан қўшин жўнатса, украинлар уни шу заҳоти яксон қилиб ташлаяпти.

Ўрис армиясининг шармандали аҳволини диққат билан кузатиб бораётган Пентагон генераллари ҳайрон! Чунки улар ҳам, бизнинг путинчи россияпараст лақмаларимиз сингари, Путиннинг армиясини енгилмас армия деб билиб, қудратига кўра жаҳоннинг иккинчи армияси мақомига эга эканлигига зиғирдай бўлсин, шубҳа қилишмаган. Мана энди эса бутун дунё Путиннинг армияси аслида фейк армия эканлигига ишонч ҳосил қилмоқда, Худо урган россияпарастларимиздан ташқари, албатта…

Кўриб турганингиздек, қардли ёшлар, автократия, коррупция ва талон-торож иллати – юрт учун, ҳудди Россияда кечаётган сингари, оғир мусибат-ла якун топиши мумкин экан.

Шокир Долимов
истеъфодаги подполковник

26.03.2022 й.

Манба: t.me/harbiyyangiliklar