O'zbekiston ERK Demokratik Partiyasi

Деҳқон бозорида давлат босқини

Деҳқон бозорида давлат босқини
24 views
21 November 2012 - 11:35

Жорий йилнинг ўтган даврида республика деҳқон бозорларида ўтказилган назорат тадбирларида қишлоқ хўжалиги маҳсулотларининг ноқонуний савдоси бўйича 1919 та ҳолат аниқланиб, ҳуқуқбузарлардан 835 млн. сўмлик маҳсулотлар далилий ашё сифатида олиб қўйилди ҳамда аҳолига арзон нархларда сотилди, дея хабар беради ca-news.org

Деҳқон бозорларида озиқ-овқат маҳсулотлари сифатини назорат қилиш, сифатсиз маҳсулотларнинг савдога қўйилиши, сифати паст, қалбаки ва контрабанда маҳсулотларини сотилишига йўл қўймаслик баҳонасида солиқ хизмати органлари томонидан доимий рейд ва талон-тарож ишлари олиб борилмоқда.

Хусусан, октябрь ойида Тошкент шаҳридаги “Эски Жува” деҳқон бозорида фуқаро Ф.Муродовдан 9,2 минг дона 3,2 млн. сўмлик, “Фарҳод” деҳқон бозорида фуқаро М.Халиловадан 7,2 минг дона 2,5 млн. сўмлик ва “Қўйлиқ” деҳқон бозорида фуқаро А.Сайсултоновдан 2,2 млн.сўмлик тухум ҳамда Самарқанд вилоятининг Нарпай туманидаги “Мирбозор” деҳқон бозорида фуқаро О.Муҳиддиновдан 2,1 тонна 3,8 млн. сўмлик гуруч маҳсулотлари олиб қўйилди.

Аниқланган “ҳуқуқбузарлик”лар бўйича 1675 нафар жисмоний шахсга 145,4 млн. сўм миқдорида маъмурий жарима қўлланилиб, 13 та деҳқон бозорининг мансабдор шахслари, 8 нафар фуқаро ва 13 нафар якка тартибдаги тадбиркорларга нисбатан жиноий ишлар қўзғатилган.

Жумладан, Тошкент вилояти Паркент тумани деҳқон бозори ҳудудида жорий йил октябрь ойида ўтказилган назорат тадбирида якка тартибдаги тадбиркор Қ.Рисқибоев томонидан 1,8 тонна гўшт маҳсулотлари савдосидан тушган 27,4 млн. сўм нақд пул назорат-касса машинасига кирим қилинмаганлиги ҳамда банк муассасасига топширилмаганлиги аниқланди. Унга нисбатан Ўзбекистон Республикаси Жиноят кодексининг 189-моддаси 3-қисми билан жиноят иши қўзғатилиб, суриштирув ҳаракатлари бошлаб юборилган.