Кеча, 2014 йил 29 сентябрь куни, эфирга узатилган “Футбол шарҳи” кўрсатувида иштирок қилган Аҳрол Иноятов (Келишилган ўйинларга қарши курашиш қўмитасининг раиси) келишилган деб гумон қилинаётган учрашувлар ҳақида бонг ураётганлардан исбот талаб қилди. “Ўйинлар келишилганлигини исботлаб беринглар”, деди А. Иноятов.

Жуда қизиқ талаб бўлди. Ҳудди келишилган ўйинларга қарши курашиш қўмитасининг раҳбари келишилган деб гумонланаётган ўйинларнинг иштирокчиларини олдиндан ўз ҳимоясига олгандай, гумонланаётганларга эса қарши гапиргандай туюлди. Иноятовнинг шу талабидан сўнг “Ушбу қўмита мухлису журналистларнинг шубҳаланишини ҳам ёқтирмайдиган, иложи бўлса, уларнинг шубҳаларини бешигидаёқ бўғизлашга тайёр турган бир ташкилот, шекилли”, деган фикр пайдо бўлди.

Бундай ўйинларга қарши кураш аввал бошдан шубҳа ва гумондан старт олиши ҳаммага маълум. Одатда мухлис ва журналистлар шубҳаланиб бонг уришади, кейин эса қўмита ва бошқа тегишли идоралар шу шубҳалар асосида мустақил текширув ва суриштирув ишларини олиб боради. Шундай экан, Иноятов: “Шубҳали туюлган ўйинлар бўлса, қўмитамизга ёзинг, мурожаат қилинг! Биз албатта текшириб кўрамиз”, деса тўғри бўлмасмиди?!

Афсуски, келишилган ўйинларга қарши курашиш қўмитасининг раҳбари шубҳаланаётганлардан исбот талаб ўтирибди. Агар мухлису журналистлар ўзлари суриштирув олиб бориб, ўйинлар келишилганлигини ўзлари исботлаб берса Келишилган ўйинлар қўмитасининг нима керагу бору, Иноятовнинг нима кераги бор?! Ахир, келишилган деб гумон қилинган ўйинлар юзасидан текширув ва суриштирув ўтказиш ваколатлари мухлис ва журналистларга эмас, Аҳрол Иноятов бошчилик қилаётган қўмитага юкланганку!

Билишимча, бу қўмитага ҳаттоки шубҳали ўйинларда иштирок қилиши гумонланаётган клуб раҳбарлари, мураббийлари ва футболчиларининг телефон мулоқотларини тинглашни сўраб, тегишли идораларга мурожаат қилиш ваколатлари ҳам берилган. Шундай экан, қўмита мухлис ва журналистлар гумонланаётган жамоалар юзасидан шундай мурожаатлар қилгани яхши эмасми?

Афсуски, ҳозирча келишилган ўйинларга қарши курашиш қўмитасининг раҳбари шубҳалар юзасидан амалий ишлар олиб бориш ўрнига шубҳаланаётганларга дашном бериш билан банд.

Қўмитанинг ҳам, унинг раҳбарининг келишилган ўйинларга қарши фақат ҳисоботу интервьюларда эмас, амалда ҳам қарши курашиш нияти борми ўзи?

Бобомурод АБДУЛЛА

P.S.: Ушбу мақоламнинг сарлавҳасини Рустам ака Сулаймоновнинг “Буқаталаб” футболчилар” деган мақоласининг сарлавҳасига ўхшатиб қўйдим.

facebook.com тармоғидан олинди