Озарбайжон ОАВ нинг билдиришича, Бокуда ўтказилган махсус рейд мобайнида биргина тунги бар ва саунада 53 шахс (45 аёл ҳамда 8 муштарий эркак) ҳибсга олинган. 

“Қўлга олинганларнинг аксарияти – 16-19 ёшдаги Ўзбекистон фуқароларидир”, – дея билдиради vesti.az сайти. Улар муштарийларга соатига 50-100 манат эвазига “хизмат” кўрсатиб келган.

Полиция маълумотига кўра, ҳибсга олинганлар “бузуқилик” билан шуғулланишган. Хабарда айтилишича, ҳибсга олинган аёллар маъмурий жазо қўлланилгач (40 манат жарима), озод этилган. Ўзбекистонлик қизлар эса ҳануз ҳибсда сақланмоқда.

“Ўзбекистонлик вояга етмаганлар билан боғлиқ Боқу воқеаси, Ўзбекистондаги иқтисодий ва ижтимоий аҳволнинг ёмонлигидан дарак беради”, дейди Норвегия Хельсинки қўмитаси вакили Ивар Дейл.

Дейлга кўра, Ўзбекистон ҳукумати, унинг мамлакат гуллаб яшнамоқда деган таассурот яратишга уринмоқда, бироқ аслида, фақат ҳукуматга яқин бўлган бир ҳовуч одамларгина яхши яшайди, қолганлар эса, Боқудаги қизлар каби ноҳақлик ва муҳтожлик қурбони бўлишади.

Бир неча муддат аввал Сирдарёлик яна бир ўзбек аёлининг Бокуда бир неча киши тарафидан зўрлангани хабари Озарбайжон ОАВда шов-шувга сабаб бўлган эди. Февраль ойида иш излаб Бокуга келган Янгиерлик ўзбек аёлининг (исми маълум сабабларга кўра ошкор этилмаётир) тил билмаслиги ва ҳимоясизлигидан фойдаланиб, узоқ муддат қулликда сақланган ва бир неча эркак тарафидан зўрланган. Охир-оқибат мазлума аёл тажовузчилар чангалидан қутилиб, “Одам савдоси қурбонларига ёрдам берувчи “Чистый мир” ташкилотидан паноҳ топган. Бугун уни Ўзбекистонга қайтариш бўйича ҳуқуқий-расмий ишлар олиб борилмоқда.

Эслатиб ўтамиз, Ўзбекистон ташқарисида меҳнат муҳожири ўлароқ бир неча миллион фуқаро ишлайди. Улар тарафидан Ўзбекистонга келаётган йиллик тушум 6 млрд АҚШ долларидан зиёд (2012 йил ҳисобига кўра). Аммо Ўзбекистон ҳукумати хорижда меҳнат қилаётган ўз фуқароларининг ҳақ-ҳуқуқларини ҳимоя этиш бўйича бирор иш қилаётгани маълум эмас.

ЎХҲ хабар маркази