Ўзбекистон президенти, Россиялик мултимиллиардер Алик Ибрагимовга, ўғлининг никох тўйи муносабати билан вертолет совға қилгани хақида, Россия матбуотида хабарлар пайдо бўлди.
Россиялик машхур актер, Грузия ва Чувашия халқ артисти унвонигахам сазовор кўрилган Станислав Садальский ўзининг блогида, Россиялик таниқли бой хонадонида бўлиб ўтган тўйнинг қизиқарли тафсилотларини ёзди.
Москвадаги Черкизов бозорининг собиқ хўжайини, Евроосиё Еврейлар Конресси вице президенти миллиардер Тельман Исмаиловга қарашли Анталия шахридаги хашаматли мехмонхонада бўлиб ўтган тўйга кўплаб таниқли мехмонлар қаторида актер Станислав Садальский хам ташриф буюрган.
Актернинг ёзишича, ўта хашаматли ва дабдабали тўйга, таниқли хорижлик санъат усталари билан бир қаторда постсовет худуди республикаларининг сиёсатчилари хам етиб келишган.
Садальскийнинг ёзишича, хар бир келган таниқли мехмон, 3 нафар тан соқчиси билан ташриф буюришган. Улар тўйхона сохибига асосан қимматбахо олтин ва олмосдан тайёрланган қиматбахо буюмлар хадя қилишган.
– Ажабланарлиси, турк соқчилари жуда кам эди. Лекин хар бир келган мехмон ўзи билан энг ками уч нафар каллакесар билан келган эди! Келин куёвга жуда кўп тақинчоқлар ва бир уюм тилла қутилар топширишди. Ўзбекистон президенти эса вертолет совға қилди, – деб ёзган ўзининг блогида Россиялик актер.

livejournal.com

Журналист Улуғбек Хайдаров тайёрлади.