Мени ёшим 25 да, бундан 10 йил муқаддам дадам бир тунда йуқолиб қолдилар. Мен аям ва опам кўчада, ҳеч нимага тушунмай қолавердик. Кўп ўтмай оилани боқиш, кун ўтказиш менга қолди. Тунлари Самарқанд бозорида 5 баъзида 10 тонналаб юк тушириб белим букчайиб оила боқа бошладим айтингчи…
Мен дангасаманми???

Ўша йили ўрта мактабнинг охирги йили эди. Тунлари бозорда ишлаб, кундуз кунлари эса мактабда мудраб бир неча дақиқа ухлаб олишни фикру хаёлимдан кетказа олмасдим. Катта танафус деб аталмиш 15 дақиқалик танаффусда эса мен партада ўтирган холда ухлаб қолардим. Бу етмагандек сизнинг ва сизнинг гумашталарингиз чўнтагини пахтадан келган даромадга тўлдириш учун пахта майдонида пахта терардим. Шунда ҳам тунлари бозорга келиб юк туширардим. Мактабдан ҳайдалмаслик учун эрта тонгда яна пахта даласида пайдо бўлардим айтингчи …
Мен дангасаманми???

Бироз ўтиб маълум бўлдики, дадам сизнинг зулмингиздан қочиб чет элга кетиб қолган эканлар. Чет элда туриб биринчи сўраган нарсалари аям билан ажралиш бўлди. Биласизми нега? Дадам чет элда сизнинг режимингизга қарши курашувчилардан бири экан ва шу сабали менинг ҳужжатларим олийгоҳда қабул этилмади. Оиладаги ажралиш мени олийгоҳга киришимга бўлган тўсиқни бартараф этди. Мен гарчи синфда энг аълочи ўқувчи бўлган бўлсамда ва кириш имтихонларини аъло баҳоларга топширсамда, тунлари ухламасдан ўсмирлик елкамда тонналаб туширган юкларим билан топган пулларни унверситет домлаларига бериб, шундан сўнггина олийгоҳ талабасига айландим айьингчи…
Мен дангасаманми???

Унверситет мени ётоқ билан таминламади. Мен ипподром яқинидаги хонадондан бир кишилик жойни ижарага олдим. Яна тунлари ипподромда ишлар, кундуз кунлари эса унверситетда уқир эдим. Беш йил бирор маротаба байрам нималигини билмадим. Контракт учун пулни ўғрилаб топмадим, ўз меҳнатим билан тўладим. Унверистетни қизил дипломга тугатдим айтингчи…
Мен дангасаманми????

Мен рус, ингилиз тилларида ўз тилим каби сўзлашаман. Компютерлаштириш программаларини мукаммал биламан. Шунга қарамасдан мен қаерга иш сўраб борсам мендан пора талаб қилишди. Бу етмагандек, вақт ўтиб ЎХХ аъзоси бўлиб гумашталарингиз назарига тушдим ва ватанимдан чиқиб кетишга мажбур булдим.

Ха, мен бугун Оврупадаман. Менинг дипломим тан олинмайдиган давлатдаман. Вақтинчалик сохам бўйича ишлай олмаётгандирман, аммо, бугун мен келажагим борлигини хис қиламан, ўз ватанида кун кураолмаган инсон. Мен бу ерда ҳам ишлайман, лекин тунлари билан тонналаб юк туширмайман. Оладиган маошим ҳам режимингиз берадиган ойликдан 50 баробар ортиқ. Мен бу ерда инсонлар каби яшаяпман айтингчи…
Мен дангасаманми.

Искандар.