Алихонтўра Соғуний

ТАРИХИ МУҲАММАДИЙ — 207
(давоми)

ЎТТИЗ БИРИНЧИ МЎЖИЗА

Фаҳд ибн Атийя ривоят қилур:

«Расулуллоҳ олдиларига ўн неча ёшлик тилсиз, дудуқ болани келтириб:

— Ё Расулаллоҳ, дуо қилинг, бунинг тили чиқсин,— дедилар.

Анда Расулуллоҳ у болага қараб:

— Мен ким бўлурман? — деб сўрадилар эрса, дарҳол бола:

— Сиз Аллоҳнинг пайғамбаридурсиз, — деб жавоб берди.

Шу билан тили очилиб кетди.

Яна бир янги туғилган болани момоси келтириб:

— Баракот бўлгай, — деб Расулуллоҳнинг қучоқларига қўйди.

Унга қараб:

— Мен ким бўлурман? — деганларида:

— Сиз Расулуллоҳ эрурсиз, — деди.

— Баракаллоҳ, рост айтдинг, — дедилар.

Шу сабабдан бу бола исмини Муборак қўйдилар».

(давоми бор)