“Шанба куни ўтадиган инаугурацияда Олий Мажлис юқори ва қуйи палатаси аъзолари, ҳукумат расмийлари ва дипломатик ваколатхоналар вакиллари иштирок этиши режалаштирилган”,-деб айтган манба.

Таъкидланишича, инаугурация Сенатнинг таъмирдан чиқарилаётган янги биносида бўлиб ўтади. Аммо таъмирлаш ишлари ҳозирча якунланган эмас.

Хабарда айтилишича, Ўзбекистон тарихида илк марта президентга президентлик гувоҳномасидан ташқари президент тўш белгиси ва штандарти ҳам топширилади.

Ўзбекистон президенти бундан буён рамзий тўш белгиси ва штандартига эга бўлиши тўғрисидаги қонунни президент Шавкат Мирзиёев сайловнинг эртаси куни – 25 октябрда имзолаган.

Ўзбекистон маҳаллий матбуотида ҳозирча президентнинг қасамёд маросими тўғрисида хабар берилмади. Ўзбекистон ҳукумати ҳам ТАСС хабарига муносабат билдирмади.

Манба: Озодлик радиоси