(Давлат қарз облигацияларининг тақдири ва иқтисодиёт хақида)

Қарзни ўз вақтида тўлаш – иноятдир,
Омонатга хиёнат – жиноятдир !

Сиёсий кураш ва сиёсий рақобатдан ўзини холи қилиб олган Ўзбекистон хукумати 1999 йилга келиб, суд хокимияти устидан хам назоратни ўз қўлига киритиб олди. Ижроия хокимиятига бўйсиндирилган қонунчилик хокимияти ва тўртинчи хокимият – расмий оммавий ахборот воситалари хукуматни танқид қилиш борасида ўз тилларини йўқотиб қўйдилар. Юқоридаги 4та хокимиятни ўз чегарасида ушлаб турувчи мухим ва зарур институт бўлмиш Конституциявий суд бир четда қолиб кетди. Манфаатлари, хуқуқлари айнан юқоридаги 4та хокимият томонидан поймол қилинаётган ахолига Конституциявий суднинг эшиклари бутунлай ёпиб қўйилди. Президент фармонларини ва рахбарларнинг Конституцияга зид ишлари устидан Конституциявий судга мурожаат қилиш ваколатига эга бўлган ташкилотларни фаолияти ижроия хокимияти томонидан тўлиқ назоратга олинди. Юқоридаги холатлар ижроия хокимиятининг хатти харакатлари мантиқ, ақл, фахм фаросат ва ўзбекона ахлоқ тарбия чегарасидан чиқиб кетишига сабаб бўлди. Фикримизни далили сифатида Тошкент шахар ва вилоят хокимликларида, шунингдек Қорақалпоғистон Республикасида ташкил этилган ва фаолият олиб борган пул эмиссияси Комиссиялари ишларини оқибатларини кўрсатамиз:
Юқорида зикр этилган комиссиялар фаолияти натижасида ахолининг 1992 йилги давлат қарз облигациялари, банкларга қўйилган омоноатлар, банкларда сақланаётган кексаликда берилиши лозим бўлган ишчи ва хизматчиларнинг нафақа жамғармалари ва бошқа жамғармалар, олдин муомалага киритилган барча пуллар кескин қадрсизланди. Товарлар ва хизматларнинг чакана нархи мислсиз ошиб кетди. Пул эмиссияси орқали кўрилган нисбатан оз фойда инсоф ва адолатни йўқотган пулпараст ва хокимиятпараст шахсларга насиб этди. Асоссиз пул эмиссиясидан кўрилган улкан ва бехисоб зарар (юқорида тилга олинган нисбатан оз фойдадан) миллион маротаба кўп зарар ахолига, банкларга, халқ хўжалиги корхона ва ташкилотлари бўйнига тушди.
Шунингдек, ахоли қўлидаги , банкларнинг корхона ва ташкилотларининг ўзбек сўмида бўлган айланма маблағларини қадрини кескин тушиши тахликаси пайдо бўлди. Хукуматга яқин бўлган бир сиқим корхона ва ташкилотлар ўз айланма маблағларини сақлаб қолдилар. Асосан кўпчилик корхона ва ташкилотлар айланма маблағларини йўқотиб, хонавайрон бўлдилар.
Ўзбеклар “Қинғир ишнинг қийиғи қирқ йилдан кейин хам очилади” деб тарбия олганлар. Ўзлари хам, фарзандлари хам қинғир ишлардан узоқ бўлсалар, хаётлари осуда кечишини билганлар.Шунингдек, “Қайтар дунё” деб, ўз ёмон ишларини бир кун келиб, ўзларига қайтишини билиб, ўзгаларга ёмонлик қилмаганлар.
Ўзбекистон ижроия хокимияти 20 йилдан бери ўзбекона тарбия ва ахлоққа зид харакатларни содир этмоқда. 1994 йил октябрь, ноябрь, декабарь ойларида қонунлаштирилган ўғрилик, босқинчилик, қароқчилик йўлига қўйилган қадамидан қайтмаяпти. Бўлган ишлар юзасидан халққа хисоб беришдан бош тортяпти. Ўтган 20 йил давомида ахолимиз давлат қарз облигацияларининг қадрсизланиб, йўқотишдан ташқари хукуматнинг асоссиз пул эмиссияси сиёсати ортидан товарлар ва хизматларнинг чакана нархларини тўхтовсиз ва мислсиз ошишидан, ўзбек сўмини узлуксиз ва кескин қадрсизланишидан жабр, зулм кўриб яшамоқда. Ахолига етказалган жабр, зулм учун кечирим сўраш лозимлигини рахбарлар тушунмаяпти.
Бош Вазир Ш.Мирзиёев ва Президент И.Каримов юқоридаги холатлардан келиб чиқиб, тобора кучайиб ва кўпайиб бораётган ахолининг шикоят ва мурожаатларига умуман эътибор беришмаяпти. Оддий ахоли билан юзлашиб, уларнинг муаммоларини хал қилишни Ш.Мирзиёев хам, И.Каримов хам хохламаяпти. Зийрак, сабр матонатли ўзбеклар хукуматнинг ахоли ва умумдавлат манфаатларига зид, пулларни асоссиз равишда босиб чиқариш ва муомалага киритишдаги қинғир ишларининг қийиғи шу кунларда очилиб бўлганини сезиб турибди. И.Каримов режими ахолига қилган ёмонликлари баробарида, режимнинг ўзига ёмонлик қайтаётганини билиб турибдилар. Ўзгаларга қилган ёмонликлари фарзандларидан қайтган ота оналар Худони эслаб қоладилар. Лекин улар бутунлай иймонсиз бўлсалар холлари не кечади.
( давоми бор)

Мустақил иқтисодчи: / Ж.Шосалимов /

Хуқуқ химоячиси: / Ш.Рустамов /

25.10.2014 йил.