Самарқанднинг барча маҳаллаларида чет давлатларга ишлаш учун чиқиб кетган фуқароларни яшаш манзилларига қайтариш ҳамда бандлигини таъминлаш мақсадида йиғилишлар ўтказилмоқда. Самарқандлик журналист Тошпўлат Раҳматуллаев шундай йиғилишлардан бири ҳақида ўз блогида ҳикоя қилади.

“Боғимайдон маҳалласида бўлган ана шундай тадбирда шаҳар ҳокими ўринбосари, хотин-қизлар қўмитаси раиси Марҳабо Ғафурова чиқиш қилди. У дастлаб “ВИЖДОН” йиғилишлари ўтказилишининг мақсад-моҳияти хусусида сўз юритди. “Биз фуқароларимизнинг хорижга бориб ишлашларини чекламоқчи ёки бунга тўсиқ бўлмоқчи эмасмиз, – деди жумладан М.Ғафурова. – Бу уларнинг конститутциявий ҳуқуқи. Мақсадимиз хорижга борганлар инсон шаънига мос бўлган шароитда ишлаш ва яшашга эришиши ҳамда турли диний ёки экстримистик оқимларга қўшилиб қолмаслиги учун уларнинг хабардорлигини оширишдан иборат”.

Нотиқ чет элдан қайтганларни иш билан таъминлаш масаласи ҳам ўта долзарб эканлиги ва шаҳар ҳокимлиги бу йўналишда қатор чора-тадбирлар амалга ошираётганлигини таъкидлади. Жумладан, айни пайтда “8 Март”, “Бофанда”, “Восток-продукт” каби қатор корхоналарда 2 мингдан кўпроқ бўш иш ўринлари мавжуд. Албатта, кўпчиликни улардаги иш ҳақи миқдори қизиқтиди. Масалан, “Восток-продукт” корхонасида ойлик маошнинг миқдори 450 минг сўмдан (150 АҚШ долларига атрофида – таҳририят) бошланар экан”, – деб ёзади журналист.

Бундан ташқари, йиғилиш давомида хорижга чиққанлар ва у ердан қайтиб келганлар билан ишлаш ва уларнинг нима билан шуғулланиб юрганлигини аниқлаш ҳақида батафсил сўз юритилди. Хорижга кетганнинг оила аъзолари ўз яқинларининг қаерда, қайси манзилда яшаётганлиги, қаерда ишлаётганлиги, бирор бир диний ёки экстримистик оқимга қўшилмаганлиги ҳақида аниқ маълумотга эга бўлишлари зурурлиги ҳақида ҳам сўз юритилган.

ЎХҲ ахборот бўлими