Муҳаммад Солиҳ

ЙЎЛНОМА
(Хотира)
(79)

СЕНАТОР ПРЭСЛЕР

Июн  ойининг  охирида  «Бирлик»  раисдоши  Абдурахим Пўлатовни  номаълум  одамлар  калтаклаб  кетишди.  Буни «Бирлик»нинг  бошқа  раисдоши  Шуҳрат  Исматуллаев  хабар қилди ва  биргалашиб  жабрланувчини  зиёрат  қилдик.  Фақат  уни  эмас, ёнидаги Миролим деган йигитни  ҳам калтаклашибди.

Икколовини  ҳам  ваҳшиёна  калтаклагандилар.  Бориб ҳамдардлик  билдирдик.  У  ердан  чиқиб,  Шуҳрат  билан  соғлиқ вазири  (Каримов  эди  фамилияси,  чамаси)га телефон қилдик, вазир жабрланганларнинг  амалиёти  учун  энг  яхши  жарроҳни  жўнатишга сўз берди. Сенатор Прэслер бу воқеанинг эртасига келди.

Ҳукуматнинг  бундай  услубга  мурожаат  қилишининг сабабини  англамайман,  деди,  америкалик  сенатор.  У  «Эрк» раҳбариятига  (4-5  киши)  Пушкин  кўчасидаги,  Ёзувчилар Уюшмасига яқин бир ердаги соҳиби армани бўлган бир ресторанда зиёфат  бераётганди.  Унга  Марказий  Осиё  диктаторлари  янги бўлгани  учун  шундай  қўпол  услуб  қўллашади,  озгина  тажриба орттирсин,  кўрасиз,  калтаклаб  ўтирмай,  йўқ  қилиб  юбораверади одамни,  деди  кимдир  ҳазиллашиб.  Аслида,  ҳазил  даври  ўтиб бўлганди.  Мен  буни  сенатор  билан  кўчага  чиқиб хайрлашаётганимда яна бир марта ҳис этдим: илгарилари жуда кўп бўлса,  орқамиздан  битта  машина  таъқиб  этарди,  энди  эса,  нақ тўрттаси,  шундоқ  кўз  олдимизда  қаторлашиб  турар,  ҳар  бирида камида  3-та  одам  ўтириб,  бизнинг  қайси  йўналишда  юришимизни кутмоқда  эди.  Дакоталик  сенаторга  бундай  примитив  кузатувлар шу  қадар  ёт  эди-ки,  айғоқчиларни  кўрса  ҳам,  хаёлига  ҳеч  бир шубҳали нарса келмади. Кула-кула хайрлашдик.

(давоми бор)