Чехия президенти Милош Земан бундан кейин жонли эфирда чиқиш қилмаслиги мумкин, деб хабар беради Vesti.ru.

Ноябрь ойи бошида Милош Земан давлат радиоси жонли эфирида чиқиш қилар экан, Россиянинг «Pussy Riot» панк-гуруҳи ҳақида гапира туриб, ножойиз сўзларни ишлатган. Аслида эса президент гуруҳнинг жуда қўпол маънони билдирадиган инглизча номини чех тилига таржима қилган холос. Бу ҳолат эса бир қатор тингловчиларнинг норозилигига сабаб бўлган.

«Чехия радио кенгаши Чехия президенти Милош Земан жонли эфирда ҳақоратли сўзларни қайта-қайта ишлатган «Ландаги суҳбатлар» дастури теле- ва радиоэшиттиришлар тўғрисидаги қонунни, шунингдек, Чехия радиоси кодексини бузгани тўғрисидаги қарор қабул қилди», – дейилади «Радио Прага» сайтидаги хабарда.

Кенгаш аъзолари ҳақоратли сўзларни ишлатишига нисбатан асосли хавотирлар бўлган шахсларни жонли эфирга қўйишнинг тақиқланиши билан боғлиқ кодекснинг 22.2-бандига алоҳида эътибор қаратишган.

«Шундан келиб чиқиб, «Ландаги суҳбатлар» дастури энди жонли эфирда эмас, балки ёзиб олинган ҳолда эфирга чиқарилиши эҳтимоли катта», – дейилади Vesti.ru хабарида. Айни вақтда, «Радио Прага»нинг ёзишича, ушбу масалада «аниқ қадамлар» тугал муҳокама қилинмаган.

Таъкидлаш жоизки, Чехия президенти аввалроқ ҳам бир неча маротаба оғзига эрк бериб юборган, хусусан, бизнес-форумдаги нутқи вақтида Америка пивосини «ифлос сув»га тенглаштирган эди.

ЎХҲ ахборот бўлими