Шоввозсой лойиҳаси “Ўзбекгидроэнерго»нинг ўз маблағлари ҳисобига қурдирган муҳим сув объекти эканлиги ҳақида бугун кечқурун “Ўзбекистон 24” канали видеорепортаж берса мен бунга ажабланмайман. Эртага президент Олий мажлисни тўплаб “ютуқларимиз ҳақида дўст душманнинг олдида гапиргим келмовди, сал иримчироқман, Шоввозсой лойиҳаси Мустақиллигимизнинг 30 йиллигига халқимиз учун сюрпризим эди” деса заррача ажабланмайман. Бу гапни эшитиб Акмал Саидов ўзини “дод” деб аввал президент қучоғига, кейин ерга отиб “мастер-класс, мастер-класс” деб алахсираса сира ажабланмайман. Кетмоновнинг ўтган тўрт йилда қарсакдан қаварган қўллари бу сафар узилиб тушиб алоҳида индивидга айланса мен бунга таажжуб ҳам қилмайман.

“Шоввозсойда эртага худойи”- деб Ортиқхўжаев оҳангаронликларни уйма уй (хато қилдимов, “уйбай” деб ўқинглар) юриб ошга чақирса ҳечам ажабланмайман. Узун-қисқа бўлиб Шоввозсойга кўтарилган оҳангаронликни иншоот остонасида қўлтиқтаёққа суянган Отабек бирад кутиб олса мен бунга ажабланмайман. Ёнмаётган ҳўл ўтинни пуфлаб пуфлаб самоварда чой қайнатаётган Сангинов тутундан ачишган кўзларини ишқалаб меҳмонларга “тепадаги хонага қараб юровринглар” деса мен бунга ажабланмайман. Сал пастроқда катта дошқозонда хоразмча палов пишираётган Раматов ошга солиниши керак бўлган гўштнинг камлигидан аччиғланаётганини кўрсам мен бунга ажабланмайман. “Тепадаги хонага иккита қора чой” деб бақирган Ариповнинг гапини эшитиб, “чой ичишмай ўл сан хороми оҳангаронликлар” деб тўнғиллаб самовар томонга югуриб кетган Ғаниевни кўрсам мен бунга ҳечам ажабланмайман. Ош еб бўлингач муфтий ҳазратлари паловнинг мойи билан ёғланган ширали овозлари билан узун узун тиловат қилсалар мен бунга ажабланмайман.

Худойидан тайёрланган репортажни кўрган қўшнимиз Мирвали ошни ўзи егандек ютиниб “туну кун халқни ўйлайдиган раҳбарларимиз бор-а, етказганига шукур деса” мен бунга ажабланмайман. Ўтган йили намбосган пахсали уйини маҳалла ҳашар қилиб битказиб берган Зулфия хола отасидан мерос қолган дилбузарига қараб ҳўнг ҳўнг йиғласа мен бунга ажабланмайман. Қизини Ҳиндистонда даволатиш учун бош урмаган остонаси қолмаган Сайпидин жўрам “қизим тузалиб кетса албатта бу воқеъа ҳақида шеър ёзади” деб ният қилса мен буни яхшиликка йўйаман.

Ажабланмайман, ажабланмайман, ажабланмайман… Мен нега ажабланмайман??? Чунки мен бу спектаклни ўттиз йилдан бери кўраман. Менинг этим ўлиб бўлган.