O'zbekiston ERK Demokratik Partiyasi

Ўзбекистон Мудофаа вазирлигига “совға”.

Ўзбекистон Мудофаа вазирлигига “совға”.
20 views
04 September 2013 - 17:14
aviasaroy

Тошкентдаги Авиасозлар Маданият саройи

Озодлик радиосидан олинган хабарга кўра, Ўзбекистон Вазирлар Маҳкамасининг 29 августдаги қарорида  Авиасозлар маданият ва техника саройи бинолари, иншоотлари ва мол-мулки Ўзбекистон Мудофаа вазирлиги ҳисобига ўтказиб берилган.

Шунингдек, Авиасозлар маданият саройига ëндош 2,16 гектарли ҳудуд ҳам Ўзбекистон Мудофаа вазирлиги тасарруфига ўтиши билдирилди.

Тошкентдаги Авиасозлар маданият саройининг исми айтилишини истамаган мулозими Озодликка саройнинг ҳарбийларга “совға” қилинишидан норозилигини билдирди:

– Биз ҳам сизга ўхшаб саройнинг эгаси ўзгарганини матбуотдан билдик. Лекин бизга ҳеч қандай фармойиш келгани йўқ. Ҳозирги пайтда меъмор Сивец номидаги Авиасозлар маданият ва техника саройи “Узавтопром” балансида турибди. Биз ўз даврида меъморлик намунаси сифатида 15 йил давомида қурилган сарой мулкининг талон-тарож қилинаëтганидан норозимиз¸

Сиздан угина, биздан бугина 

Саройнинг Ўзбекистон Мудофаа вазирлигига “тортиқ” қилиниши яна бир адолатсизликни хаспўшлаш учун қилинган, жорий йил ёзида Ўзбекистон Мудофаа вазирлигига тегишли Округ офицерлари уйи биноси Тошкент Давлат Юридик университетига “совға” қилинган эди.

1885 йилдан бери Тошкент зобитларига тегишли бўлган шаҳар марказидаги Округ офицерлари уйи биносининг Юридик университетга берилиши ҳарбийлар орасида яширин норозиликни келтириб чиқаргани айтилган эди.

Ўзбекистон бошқарув элитасидаги Тошкент Давлат Юридик университетининг “яширин ҳомийлари” шаҳар марказидаги тарихий бинони асл эгаси бўлган ҳарбийлардан сўрамасдан “ўзлаштиришга” муваффақ бўлишган.
Айни бошқарув элитасидаги ҳарбийлар эса мамлакат раҳбариятига бу қарорнинг адолатсиз бўлгани ҳақида “ишорат” беришган.
Озодликнинг зобитлар орасидаги манбасининг хулосасига кўра¸ ҳарбийларнинг эҳтимолий норозилигига барҳам бериш учун Тошкентдаги Авиасозлар маданият саройи Ўзбекистон Мудофаа вазирлиги тасарруфига  бадалсиз ўтказилиши ҳақида қарор қабул қилинган.
Ўзбекистон бошқарув тизими деб аталган тубан тизим ичидаги “мол талашиш” борасидаги бу иддаони расмий манбалардан тасдиқлаш бироз мушкул. Чунки, расмийларнинг ҳаммаси ҳам “ота”сидан қўрқишади.

Сарой ва уй ҳақида

Тошкентдаги Авиасозлар маданият саройи 1980 йилда фойдаланишга топширилган.
Сарой моҳиятан совет обидаси ҳисобланса, Тошкент марказидаги Округ Офицерлар Уйи биноси колониал меъморчилик намунасидир.
Бу бино Туркистон мустамлакаси даврида руслар тарафидан қурилиб, бизнинг кунларимизгача сақланган обида сифатида кўрилади. Унинг бош биноси 1885 йил қурилган.
Россиядаги 1917 йил инқилобига қадар ООУ биносида Ҳарбий кенгаш жойлашган.
1924 йилдан бошлаб у ерда Офицерлар уйи жойлашди (дастлабки номи – Қизил армия уйи). 1945 йили у “Округ офицерлар уйи” деб номланди.
1991 йилда Ўзбекистон Мудофаа вазирлиги томонидан бу бино “Марказий офицерлар уйи” деб қайта номланди.

Чарос