Ўқувчилигимизда бир кекса тарих ўқитувчимиз бўларди. Ҳамиша: “Дўсту нодондин душману олтин зийрак яхши” деб қўярдилар…

Муътабар Тажибоева, сени “ўқимагансан, қаричинг ҳам шунга яраша калта” десам, мендан хафа бўласан.

Сен нима қилиб қўйганингни биласанми, таҳлил қила оласанми? Миянгга мита тушмаганми мабодо?

Сен Муҳаммад Солиҳнинг қўлига инкор қилиб бўлмайдиган далил тақдим этиб қўйдинг-ку!
Энди сен хожаларингнинг калтафаҳимлигини – бу хатосини тўғрилаб бўладими?

Муҳаммад Солиҳ билан Россиядаги бир қочқиннинг ўртасида бундан уч йил аввалги, Каримов вафоти кунлари бўлиб ўтган телефон сўзлашувларини, махфий ёзиб олинган мулоқотни элга ошкор этиб, ўзингча, Америка очдингми?
Ҳожанг ким сенинг, “куратор”инг ким!

Сен Муҳамад Солиҳнинг қўлига “Ўзбек мухолифат етакчиси Ўзбекистон ҳукуматининг махфий хизматлари томонидан ҳамиша таъқибу тазйиқда, кузатувда умргузорлик қилгани ва қилаётганлигини инкор қилиб бўлмайдиган далилий ашё” бериб, ўзингни ва “куратор”ингни оламга ошкор қилиб қўйдинг-ку!
Таёқнинг ҳамиша икки томони бўлишини билмасмидинг? Унинг бир учи мўлжалингдаги одамнинг бошини ёрса, иккинчи учи ўз бошингни қон қилиши ҳақида эшитмаганмисан?

Майли, сен ўқимаган, уқмаган бир оми хотинсан, бироқ ҳожаларингни нима жин чалган?!
Суҳбатни эшитдик.
Нима бўпти? Гул умри ёт юртларда сургунда ўтган одам умрининг кушандаси оламдан ўтса, суюниши табиий эмасми?
Юртга қайтишни орзуласа, айбми?

Мана, сенам юртга қайтиш илинжида олапар каби илинган одамнинг оёғидан олиб юрибсан-ку!
Мухолифат шундай ўйлайди, шундай сўйлайди!
Суҳбатдаги Мирзиёев шаънига нисбатан бундан уч йил олдинги айтилган сўзларни КАТТАнинг қулоғига етказсам, юрт дарвозалари менга ланг очилади деб ўйладингми, нодон!
Энди, гапни мендан эшит: Мирзиёевнинг президент бўлганида энсалари қотиб кетган одамларнинг бири мен бўламан!

Қаерда-ки йиғилиш бўлса, “Осмондан тушган одам эмас, сал кам 14 йил мамлакатда иккинчи одам бўлган. Барча иллатларни беш қўлдай биларди. Халқ ҳаётида “инқилоб” қилса, шу 14 йил давомида лоақал бир соҳада бўлсаям қиларди. Вилоят ва туманларга нуқул қамалиб чиққанларни ҳоким қилиб тайнилаб қўйган. Бир оғиз сўз билан айтганда, “мамлакатни бир ҳовуч жиноятчилар бошқармоқда” дея мамлакат ичкарисида туриб, баралла айтган, айта олганларнинг биттаси ўзим бўламан.
Нима қипти?

Бу гапларни гапираётганимда сенга Муҳаммад Солиҳнинг телефон сўзлашувларини хуфёна ёзиб узатган “куратор”ларинг менинг овозимни ёзиб олишмади, тепадагиларга етказишмади деб ўйлайсанми? Менинг бу гапларимдан кейин айрим “ҳуқуқбонлар” мени айланиб ўтишарди!

Бироқ нимадир сабаб бўлади-ю, инсон ўз фикрида туб бурилиш ясайди.Мирзиёевни кескин танқид қилиб юрган фуқаро президентнинг кейинги чиқишларини кузатдим, нутқларини қайта-қайта эшитдим. Бу ҳукумат арбоби билан битта ўхшашлик жиҳатимиз борлигини сездим: шеваси сираям ўзгармабди! Умри Бошкнетда ўтган бўлсаям, Бош вазирлик қилсаям… Тили “вуза, вотти, “ока” деб бирам буралиб кетмабди. Ўз диалектини йўқотмабди.

Қарасам, Мирзиёев мамлактада ўзгаришлар қиламан деб чинданам куйиб-пишаяпти: ҳали бу порахўрни ишдан олади, ҳали бу арбобнинг таъзирини беради, ҳали бунисини танобини тортиб қўяди. Жон куйдиради, фуқаролик жамиятига эркинлик беришга уринади.
Кейин мен ўзимга ўзим дедим: Хай, кел, қўй, шу одамга Яратганнинг назари тушибди. Нимадир қилмоқчи, нималарнидир ўзгартирмоқчи. Имкон қадар қаватига кириб, қўлимиздан келганча кўмаклашайлик қани”, дедим ўзимга ўзим.

Ҳа, нима, жиноят қилибманми?

Мен ҳаддимни билмайман. Гоҳида ҳаддимдан ошиб кетгудек бўлсам, Муҳаммад Солиҳ менга “Ҳар қандай одам ҳам имконият беришга муносиб” деб қўярдилар. Ажаб эмас, 3 йил олдинги ўша суҳбатдан кейин мухолифат етакчисининг ҳам Мирзиёевга нисбатан фикри ижобий томонга ўзгарган бўлса.

Инсон дунёқараши тош эмас-ку бир жойда қотиб қолган!

Эй, миясига мита тушган Муътабар! Бу сиёсат! Сиёсат шундай нарсаки, халқ манфаати учун керак бўлса, ашаддий душманингга ҳам ним табассум қиласан, қўлларини қисиб, қучоқ очасан! Элнинг эртаси учун шундай қилишга мажбурсан!

СенЛАРнинг бу “далилий ашё”ни эълон қилишдан мақсадларинг нима эди ўзи?
Мухолифат ва ҳукумат ўртасига ўтиб бўлмас жарлик тўшашми? Ёки Мирзиёевни ҳам Каримов каби қўрқув исканжасида тутиб туришми?
Нима?
Сенлар ўзларингиз қурган тузоққа ўзларингиз тушганингизни ҳам сезмайдиган даражада жоҳилмисизлар?

Малоҳат Эшонқулова