Инсон ҳуқуқларини ҳимоя қилиш ташкилоти “Ўтюраклар клуби” раиси Мўътабар Тожибоева таниқли имом Обидхон қори Назаров жонига суиқасд ҳаракатига алоқадор кўрилиб, Россияда ҳибсга олинган Юрий Жуковский ҳақида маълумот оммага ошкор этилишини талаб қилиб чиқди.

Мўътабар Тожибоевага кўра, 12 октябр куни ҳибсга олинганидан бери ўтган вақт ичида Жуковский ҳақида бирон маълумот берилмаган.

“Ўтюраклар клуби” раҳбарининг тахмин қилишича, Юрий Жуковскийнинг Россияда ҳибсга олинганидан бери МТС мобил телефон ширкатининг Ўзбекистонда юз тутган муаммоларининг ижобий томонга ҳал бўлиши мумкинлиги белгилари пайдо бўлган.

Ана шу ҳолат Россия Жуковскийни Швецияга топшириш ёда топширмаслик билан Ўзбекистон томонига таъсир ўтказишга ҳаракат қилаётганлиги белгиси бўлиши мумкин, дейди Мўътабар Тожибоева.

“Ўзбекистон Жуковскийни Швецияга топширмасангиз, МТС муаммосини ҳал қилиб берамиз, деб талаб қилиши эҳтимоли бор. Шунинг учун бу жараён атрофидаги ҳамма маълумлотлар ошкор бўлиши шарт”, деди ББС билан суҳбатда Мўътабар Тожибоева.

Ўзбекистон ҳукуматининг ашаддий танқидчиларидан бўлган Обидхон қори Назаров 2006 йилда Швециядан сиёсий бошпана олганди.

2012 йил 22 феврал куни у пешин намозига чиқаётган пайти, ўз уйи йўлагида яқин масофадан отиб кетилганди. Ўшандан бери Обидхон қори Назаров шифохонда кома ҳолатида ётибди.

Кейинчалик суиқасдга алоқадорликда гумонланиб, ёшлари ўттизларда бўлган икки Ўзбекистонлик эр-хотин ҳибсга олиниб, маҳкамага тортилди. Улар суиқасдни режалашга билмасдан алоқадаор бўлиб қолганликларини даъво қилишди ва маҳкама уларни оқлади.

Суиқасд амалини бажарган асосий шахс эса қочиб кетгани айтилган ва кейинчалик унинг Россияда ҳибсга олингани хабар берилди.

Россияда қўлга олинган шахс 34 ёшли Юрий Жуковский эканлиги хабар берилган. Унинг ҳам Россия ва ҳам Ўзбекистон фуқароси эканлиги айтилади.

bbc.co.uk/uzbek