ҲУР ЯРАТДИНГ

Жон ичра жон яратдинг, ё Раб,
Қалбда иймон яратдинг, ё Раб,
Яхшига дор, ёмонга бардор,
Нафсга имкон яратдинг, ё Раб.

Тан мулкида жаҳолат устун,
Кулга дўнди муҳаббат бугун,
Гоҳ тиргиздинг, гоҳ ўлгиздинг,
Қон ичра қон яратдинг, ё Раб.

Нурдан тиклаб ёруғ дунёни,
Бунёд этиб Одам, Ҳавони,
Кўзимиздан камалак тортдинг,
Дун ичра дун яратдинг, ё Раб.

Термултирдинг бир-биримизга,
Раҳм этмадинг ҳеч қачон бизга,
Осий банданг, занжи қулингмиз,
Дин ичра дин яратдинг, ё Раб.

Шоҳлигингда сендан-да ҳақ йўқ,
Биздан сўқир, биздан ноҳақ йўқ.
Жаннат ичра покка йўл бердинг,
Ҳур ичра ҳур яратдинг, ё Раб.
1994 й.

Ислом Холбой
“Ҳижрон азоби” Шеърлар китоби, 
Тошкент, “Ёзувчи нашриёти”, 1998 йил

Facebook.com