Ўзбекистон Олий Мажлиси Сенати қонунчиликка киритиладиган ўзгартишларни тасдиқлади. Мазкур ўзгартишлар жиноят процессида эҳтиёт чораси сифатида уй қамоғи жорий қилишни назарда тутади. Бу ҳақда “Ўзбекистон” телеканалининг “Ахборот” дастури хабар берди.

Уй қамоғи дастлабки суриштирув босқичида гумонланувчи, айбланувчи ва судланувчини жамиятдан тўлиқ ажратиб қўймаган ҳолда ўз уйи доирасида эркинлигини чеклашга қаратилган чорадир. Ушбу чора ҳориж амалиётида қонуний асосларда кенг қўлланиладиган эҳтиёт чораларидан биридир.

Ўзбекистон шароитида мазкур чора шу пайтгача ўзининг қонуний асосларига эга бўлмаган. Бироқ шунга қарамасдан, амалиётда уй қамоғининг норасмий тарзда қўлланилиб келиниши кузатилади.

Бу ерда гап жиноят процессидаги дастлабки суриштирув билан боғлиқ бўлмаган ҳолатлар ҳақида бормоқда. Хусусан, давлат сиёсатидан ўзгача фикрлайдиган шахслар, шунингдек, давлат ҳокимиятининг турли поғоналаридаги мансабидан четлаштирилган ёки президент назаридан қолган собиқ мулозимларга нисбатан одатда назорат чораси сифатида уй қамоғи қўлланилгани кузатиш мумкин.

Шу сабабли ҳам ушбу чоранинг Ўзбекистон амалиётидаги шаклини ҳуқуқий эмас, балки сиёсий асосларга эга бўлган норасмий назорат чораси дейиш мумкин.

Эндиликда уй қамоғининг қонунан мустаҳкамланиши амалиётда қайсидир ёпилмаган жиноят ишига алоқадорлик баҳонасида ҳар қандай ўзгача фикрлайдиган шахсга нисбатан мазкур чорани қўллаш каби янги прецедентни юзага келтириши мумкин.

ЎХҲ ахборот бўлими