Бундан 19 йил бурун Тошкентда 16 феврал портлашлари юз берган, халқаро журналистлар воқеанинг суддаги асосий гувоҳи Зайниддин Асқаровдан портлашлар ҳақидаги ҳукумат версиясини чиппакка чиқарган тарихий баёнотни олишган эди.

«Элтуз» нашри мухбири билан суҳбатлашган Би Би Си журналисти Пахлавон Содиқ биринчи марта ушбу интервюнинг парда орти сирлари ҳақида гапириб берди.

Пойтахтнинг бешта жойида бир вақтнинг ўзида уюштирилган террордан сўнг, 2003 йили, Би Би Си, Озодлик ва Америка овози журналистларига берган интервьюсида воқеанинг асосий гувоҳи Зайниддин Асқаров жумладан шундай дейди:

«Муҳаммад Солиҳнинг, Аллоҳга қасам ичиб айтаман бу гапимни, умуан террорга алоқаси йўқ. Мен демократ ҳам эмасман. У одамни яхши кўриш, ёмон кўриш мақсадим ҳам йўқ. Холисона баҳо бериш, – ҳеч қандай алоқаси йўқ!

Бу бизнинг сиёсий кўрлигимиз, Зокир Алматовга ишонганимиз натижаси холос»

Воқеадан сўнг бир қанча МХХ ходимлари ишдан кетгани, шунингдек кучишлатар тизимларнинг халқаро матбуот билан ораси очиқ бўлганини билдираркан, Паҳлавон Содиқ яна муҳим бир деталга эътибор қаратади:

«Нимагадир ўша куни, «Озодлик» ва «Америка овози» Зайниддин айнан ўша баёнотни МХХ ходими чекиш учун ташқарига чиқиб кетган пайти айтган эди дея талқин қилган.

Ундан кейинги айни суҳбат тилга олинган мақолаларда ҳам, МХХ ходими ташқарига чиққан пайтда Асқаров Муҳаммад Солиҳ ҳақида баёнот берди деган нотўғри, мутлақо нотўғри талқин бор!

Мен юз фоиз ишонч билан айтаман, Зайниддин Асқаров ўша суҳбатнинг энг кульминациясида, Муҳаммад Солиҳ ҳақида баёнот берган пайти, хали ўтирганди СНБ ходими бизнинг ёнимизда.

Фақат ўша баёнотдан кейин, СНБ ходими ташқарига чиқди ва менинг назаримда рахбарият билан маслаҳатлашиш учун чиқди.
Орадан 10 дақиқа ўтди ё ўтмади, СНБ ходими қайтиб кириб, дарҳол суҳбатимизни тўхтатишни талаб қилди…».

Манба: Eltuz.com