Польшанинг W Politice ахборот агентлиги “Путин заҳарланишдан қўрқади. Унинг кўз ўнгида махсус дегустатор ҳар бир таомни татиб кўрмоқда…” (Putin boi się otrucia. Specjalny degustator próbuje przed nim każdy posiłek…) номли мақолани эълон қилди. Мақолада Малайзия Боинги уриб туширилиши натижасида 298 одам ҳалок бўлганидан сўнг президент Путиннинг ҳаловати қочгани ва қўрқув ичида яшаётгани айтилади. Аслида, Путиндаги паранойя ҳолати ҳақида илк бора Россиялик тадбиркор Александр Лебедевга тегишли бўлган The Indеpendent газетасида тилга олинганди.

“Россия президенти Владимир Путин ҳар қандай таомни бошқалар татиб кўрганларидан сўнгина истеъмол қилишни одат қилиб ўрта аср анъаналарига ҳос тарзда яшамоқда. Ўтган ҳафтада Украина шарқида Малайзия авиакомпаниясига тегишли самолёт йўқ қилинганидан сўнг Кремль эгасидаги параноя ҳолати авжига (рaranoja jeszcze wzrosłа) чиқди”, – деб ёзади Британиянинг «Indеpendent» газетаси.

Бу ҳолатни тушунса бўлади. Чунки биринчи навбатда Оврўпа Иттифоқи ва АҚШ томонидан кенг санкциялар катта зарар кўрган рус олигархлари Путиндан қутилишни истаб қолишлари мумкин.

“Россия президенти истеъмол қилиши керак бўлган ҳар бир таом дегустатор деб атаса бўладиган унинг тан соқчилари аъзоси томонидан синчковлик билан текширилади. Мана шу тарзда Путин шўрвасига полоний сингари радиоактив модда қўшилмаганига ишонч ҳосил қилади. Чунки Унинг ўзи айнан шу модда билан собиқ Федерал Хавфсизлик Хизмати агенти Александр Литвиненкони заҳарлаб ўлдирганди”, – дея таъкидлайди “Бош ошпазлар клуби” президенти Жил Брагар ўзининг «The Indеpendent» газетасига берган интервьюсида. Шу ўринда қайд этиб ўтиш жоизки “Бош ошпазлар клуби” дунё лидерлари учун таом тайёрлайдиган 27 та бош ошпаздан иборат.

Жил Брагарнинг сўзларига кўра Россия президенти олий даражадаги халқаро учрашувларга ўзи билан туз, қалампир, сув ва салфеткалар олиб боради.

“Барибир ўзига эҳтиёт бўлган маъқул”, – дея кулади (Путиннинг устидан – ЎХҲ) Брагар”, деб ёзади W Politice.

Аввалроқ Москвадан доимий яшаш учун Англияга келган рус офицери, КГБ майори Виктор Суворов Варшаванинг «Rzeczpospolita» номли газетасига берган интервьюсида: “Ҳеч нарса Путиннинг обрўсига йўловчи самолётини уриб туширганлик каби таъсир қилмайди. Бу ҳолат пировард натижа Путиннинг тахтдан ағдарилишига олиб келади”, – дея башорат қилганди.

Баъзи экспертларнинг фикрига кўра Путин Украина мавзусини кун тартибидан олиб ташлаш мақсадида оммавий қотилликка қўл урган. Шунга ўхшаш ҳолат “Асаднинг кимёвий қуроли” номи остида Сурияда содир бўлганди.

ЎХҲ ахборот бўлими