O'zbekiston ERK Demokratik Partiyasi

Гўзал БЕГИМ: ВАТАНИ ҚЎЛИДАН ТУШГАН ОДАМНИНГ

Гўзал БЕГИМ: ВАТАНИ ҚЎЛИДАН ТУШГАН ОДАМНИНГ
239 views
20 December 2024 - 17:55

Ўзбекнинг улуғ ШОИРининг туғилган куни бутун бир асрга, Инсониятга, ҲАҚ деган ҳар бир инсонга, муборак бўлсин!

***
                           Устоз Муҳаммад Солиҳга

Сизни яхши кўриб бўладими
сиз севган эркни
ватанни
одамларни
яхши кўриш мумкинми
рухсат тегадими севишга сизли асрни?

Сиз ҳақда ўйласам,
хаёлларни яширайми осмондан
сизни танимасдай
ўтиб кетайми
кўзларим чуқурига ботиб қолган
шеърлар ёнидан?

Ойнага қандай қараса бўлар
агар майдаланган бўлса
ойна
кимни кўрсатади ўзида?

Декабр пальтосидан бошим чиқариб
қарасам бўларми
1949
1992
Ёки
1924 га
юракнинг қай жойига
кўмса бўлар Адабиётни?

Тамаки тутатган тақдирнинг
тутунини чўнтакка солиб
кейин унинг буралишида
ясантирсам умидларимни
кўзёшларим тутунга айланса
тутунга айланса бутун бир
қитъа.

Нарироқ тур, деманг орзуларимга
бармоқларимни қисирлатманг
ҳайратларни шишириб
шишириб
юлдузларни
энг ёруғ фикрга айланса само.

Бўёқларни тўкиб юборсам мартга
асетон билан артсам
доғ теккан йилларни
сўзларни
ўйларни
ўчирсам хаританинг
сичқон еган қирраларини.

Вақтдан кечирим сўраяпман бугун
қулоғини бураяпман
бузилган соатларнинг
айниган тоқатларнинг
чангин қоқаяпман биллур хаёлнинг.

Ёмғирда ювилган эълондай
ватани қўлидан тушиб кетган одамнинг
елкасидан
думалаган
тоғлари
кўклам имзо чеккан боғларга
йиғлаган манзара ичига кириб
йиғласам
кўзёшим сачрарми тоғларга?

20-декабрни
яхши кўрсам бўладими
яхши кўргандай эркни
яхши кўргандай ватанни
рухсат борми
севишга
юртни?

20-декабр 2024 йил