ДЕНГИЗ МУЗЕЙИ БОР ИЧИМДА

***
Мен депрессиядаги одамман
сени эмас, депрессияни севаман кўпроқ
тушиб чиққан ҳар бир чоҳимни
чоҳ оғзидаги гулни
санчилгувчи тиканларни ва
кўзимдан таралаётган қоронғиликни
севаман.

Шамол депрессияга тушса қандай эсади
ёки
руҳий ўпқондаги қушлар
сайрар, сайрар ичимда тинмай
ичимда
жуда ҳам чуқурликда
чўк тушади шуъла зулмат рангида
тушкун шамол эса
эсади
эсади
тўхтаб турмайди.

Денгиз музейи бор менинг ичимда
жимир-жимир мавжлар сакрайди
экспонат тўлқинлар
чиғаноқ юраклар
шиғирлайди қулоқларимда
арғимчоқдай солланар денгиз
юрак айлангунча учаман кейин
ва
ғарқ бўламан мовий музейга.

Чакалакзордан ўтаётган ифордай
қолиб кетдим тиканлар орасида
юрагингни қора билиб
хаёлингга осилиб
чиққим келар руҳий жарликдан
чиғириқлар эса сочим турмаклайди
силкинган
силкинган
оғриган сочимни
турмаклайди руҳий қудуқлар.

12 май 2023 йил

ТУЙҒУЛАР ТАРИХИН ТАҲРИР ҚИЛАМАН
***
“Жоним” деган сўзни
айтмай қўйиш мумкин узоқ вақт
унутиш мумкиндир бутун умрга
энди айтсам агар
жони оғриётган одамнинг
иҳрашига ўхшаб чиқади бу сўз –
“жони-и-и-им” .

Ойнага қараб
машқ қиламан
унутиб қўйилган бу сўзни
бўғзимга қийшиқ тақаман
барибир
бу сўзни айтаркан
лаблар ёниб кетмайди энди.

Туйғулар тарихини таҳрир қиламан
қадимий тасмага
эркалаш оҳангида
ёзаман
ўчираман
ва яна ёзаман
иҳраш услубига эврилар ҳар гал
энди “жоним” сўзи менга бегона
фақат
жоним оғрияпти
“жо-о-н-и-и-м…”

13 май 2023 йил

РАҚСГА ТУШЯПМАН ТУТУНИМ БИЛАН
***
Ёнаяпман чарс-чурс ёнаяпман
тутунимда пари рақс этар
Айседора Дункан рақсидек эркин
биологик чизиқлардан тошган жунун ва
фожиа устида елдек ўйнайман

Лойдан ясалган гул бор кўксимда
лой кўринишида
гувала ишқ шарори
қарайди қарайди қарайди
ёнишимни кузатади шиша оломон
тутуним-ла рақс тушаман фақат бир ўзим.

Ёнаяпман кўзларимда тутаб ёняпман
бурқсиб-бурқсиб дуд чиқади кўзёшларимдан
сенинг сўнгги аксинг ва
менинг нолам
буралган тутунда қанот чиқарар

Тутун орасида озод рақс этдим
заҳар сочган илоннинг оғзида туриб
арслон панжасига сочимни илиб
ичимда арилар учиши монанд
кул ичида гуллаган атиргул каби
қалбимнинг букилишини
туйғулар эластик қиёфасини
рақсимга нақшлаб ўйнайман

Осмонда рақс этдим узуун бир кеча
юдузлар пойида ўйнадим
мавжларнинг қалбида ўйнадим
шамолнинг сочида ўйнадим
туннинг юрагида чопдим, ўйнадим
шудринг дудоғида ўйнадим
ўйнадим
ўйнадим…

13 май 2023 йил

PS: Сувратга 2002 йилда Москванинг Добролюбова кўчасида жойлашган Адабиёт институти ётоқхонасида тушилган.

Фотосувратчи: Татьяна Зоммер.

МУЗЛАТКИЧДАГИ ГУЛНИ ЮРАГИМГА ҚЎЙ
***
Ўзингни шундай тут
музлаткичдаги гулни қўй қайноқ юрагимга
ва бегонага айлан
чопқиллаб ўтиб кет юрагим ёнидан
кул
ха-хо-ла
туйғуларнинг йиртиқ жойларига қараб
ҳеч қачон мени кўрмагандек тут ўзингни
ичингдаги дарёга йиқил
оқиб кет кейин
ва қайтиб келма оқиб кетган жойингга
мен фожиа билан рақс тушавераман
чарчасам ҳам барибир менга
тушуняпсанми
чўпдан қурилган уйга айланаман кейин
бир чўпи қийшайса
қулаб кетади бу иморат
ўзингни шундай тут
ортингга қарама
юракни мушак деб қараб
учиб ўт унинг устидан
ёнидан
ёнгинасидан.

16.05.2023

ОЙНИНГ ГАЖАГИГА ОСИЛГАН ПАРГУЛ
***
Туйғулар тадқиқчисиман
ҳар бир туйғунинг бошини айлантираман
эртадан кечгача
тундан тонггача
улоқаман улар билан кейин.

Юрагимга
бу дунёда ҳеч ким айтмаган сўзни айтаман
юрагимга
қараб ўтираман бутун кун бўйи
юрагимга
сендан бошқасини таклиф қилолмайман
юрагимга
оғирлик қиляпти битта япроқ ҳам.

Мен
бўйнимга маржондай тақаман тўлқинларни
сочларимни мавжлар билан турмаклайман
киприкларимда оқшомни кўтариб олиб кетаман
юрагимга
занжирлаб ташлайман
кўз ёшларни
қўлимда
соат милларининг орасидан
исмингга қарайман аслида.

Юрагим
қуёшнинг қўшнисидир
сувдан иборат оловдир у
сомон йўлидан думалаб кетган
думалаган
думалаган
ойнинг гажагига осилиб қолган
паргулдай олмадир юрагим.

Ҳислар оғирлигини тортаман
ўлчайман ҳажмини
ва ҳар гал
осмон тешигидан туриб
қарайман юракнинг четига..

17.05.2023

PS: Сальвадор Далининг “Рақс тушаётган момақаймоқ” асари.

ҲИСЛАРИНГНИ ТАШЛАБ ЮБОРСАНГ
***
Беш дақиқа
ёки атиги беш лаҳза
менинг ҳаётимни яшаб бероласанми?
қарғалар чўқиган
қузғунлар талаган
ҳисларини сичқон кемирган шу ҳаётни.

Умидининг у чети билан бу четига
мўрт оғоч кўприк қилиб қурилган
илон пўстини шарфдай ўраган
сочларининг орасида
чумолилар қишга озиқ ғамлаган
орзулари моматалоқ бўлиб кетган
қиз ҳаётини яшай оласанми?

Йўл четида такси тўхтатган монанд
мен ҳар куни
изтиробни тўхтатсам
ўтирсам унинг уловига
манзилимга етсам фақат у билан
уйимнинг ҳар устунида
чўкка тушган каби турса соялар
ҳаётимда бир боргина мусиқа қўйсаму
йиғи қўшиғини тингласам.

Юрагинг илма-тешик бўлиб кетса
шиппакдай судрасанг ёлғизликни
қабристон энг гўзал шаҳарга айланса
уйингда сени ҳеч ким кутмаса
сочинг эсаверса бошқа дунёга қараб
кесиб ташланган сочингни силаётган қўл
фотога дўнса
гумбурлаб қуласа
ҳўрсиниқларинг.

Юрагингга тирмашиб чиқсанг ҳар кун
ва думалаб кетсанг
тирмашиб чиқаверсанг қайта
ойнага тирмашган томчи мисоли
юрагингни артсанг “уҳ-уҳ”лаб
ишқаб, ярқиратсанг
кўзингнинг энг орқа деворларини.

Ҳисларингни ташлаб юборсанг
қирқ тўққизиничи қаватдан
ҳеч кимнинг кўзига ёш келмаса
бевақт қурбон бўлган ҳисларга қараб
юрагинг ҳаддан ортиқ кўпроқ уриб юборса
тарозига сиғмаса кўз ёшларинг
ва жимгина
бошингнинг эгилган алфозида
ўйма гуллар ясасанг ҳовурдан

беш дақиқа
атиги беш лаҳза
менинг мана шу ҳаётимга кириб
яшаб бера оласанми?!!

18 май 2023 йил.