Сиз асло янглишмадингиз (бу ерда муаллиф Каримберди Тўрамурод Муҳаммад Солиҳга мурожаат қилмоқда – таҳр.), Ўзбекистонда Мустақиллик Декларацияси 1990 йил 20 июнда халқ сайлаган депутатлар, сизлар томонингиздан тайёрланиб, тасдиқланган. Демак, чин Мустақиллик куни 1990 йил 20 июн ва бугун Мустақилликка 35 йил эмас, 36 йил бўлди!

Сизни бу байрам билан алоҳида табриклайман!

Афсус, сўнгги дамгача мустақилликка қарши бўлганлар Мустақилликни ўзиники қилиб олишди, ҳатто “Мустақиллик меъмори” деган номни ўзига олишдан ҳам уялишмади.

Мустақиллик шиори бўлган, олис 80-йиллардан бери бу учун курашган, ҳайқирган ҳақиқий истиқлолчилар эса, Мустақиллик душманларига айлантирилди.

Фалакнинг кажрафторлигини кўринг: икки кун олдин “Мустақиллик қайсингнинг оғзингдан чиқса, ўзим каллангни оламан”, деган одам, ўзи Мустақилликни эълон қилгандан кейин ҳам СССР таркибида қоламиз, деб ўзбек халқини Референдумда овоз бердирган Мустақиллик душмани бугун Мустақиллик меъмори, Мустақиллик шиорини кўтариб чиққан сиз ва сафдошларингиз эса, бугун халқ душмани, Мустақиллик душмани!

“Уч нарсани узоқ бекитиб бўлмайди, бу қуёш, ой ва ҳақиқат”, дейди Конфуций. Инша Аллоҳ, оз қолди, РОСТ ТАРИХ ёзилади. Ҳаммаси жойига тушади. Сохта авлиёнинг ҳайкаллари қулайди. Мустақиллик учун курашганлар номи оқланади! 1990 йил 20 июн Мустақиллик куни бўлади. Биз ана шунда байрам қиламиз!

Манба