Polsha sobiq prezidenti Lex Valensa AQSHning amaldagi prezidenti Donald Trampga quyidagi maktubni yozdi:

“Janobi Oliylari, Janob Prezident,

Biz sizning Prezident Zelenskiy bilan bo‘lgan suhbatingizni qo‘rquv va nafrat bilan kuzatdik. AQShning Rossiyaga qarshi kurashda Ukrainaga ko‘rsatayotgan moddiy yordamiga minnatdorlik kutishingiz haqoratlidir.

Minnatdorlik, allaqachon 11 yildan ortiq vaqt davomida o‘z vatanini va erkin dunyo qadriyatlarini himoya qilish uchun qonini to‘kayotgan qahramon ukrain askarlariga bildirilishi kerak.

Erkin dunyoning ramzi bo‘lgan mamlakat yetakchisi buni qanday tushunmasligi mumkin?

Oq uyda bo‘lib o‘tgan suhbatning muhitini biz xavfsizlik xizmatlari va kommunistik sudlar oldidagi so‘roqlarga o‘xshatdik. O‘sha paytda prokurorlar bizga butun hokimiyat ularning qo‘lida ekanligini va bizda hech qanday kuch yo‘qligini aytishardi.

Ular bizni hamkorlik qilishdan bosh tortganimiz yoki zulm uchun minnatdorlik bildirmaganimiz uchun erkinligimizdan mahrum qilishardi. Prezident Zelenskiy bilan xuddi shunday muomala qilinganini ko‘rib dahshatga tushdik.

Tarix shuni ko‘rsatadiki, AQSh demokratik qadriyatlardan va Yevropadagi ittifoqchilaridan uzoqlashganda, oxir-oqibat o‘zini xavf ostiga qo‘yadi.

1917 yilda AQSh Birinchi jahon urushiga qo‘shilganida, Prezident Vilson buni tushungan edi. Prezident Ruzvelt esa 1941 yilda Perl-Harbor hujumidan so‘ng Amerika himoyasi Tinch okeanida ham, Yevropada ham kurashni talab qilishini anglagan edi.

Prezident Reygansiz va AQShning moliyaviy yordamisiz Sovet imperiyasining parchalanishi imkonsiz bo‘lardi. Reygan Sovet Ittifoqini “yovuzlik imperiyasi” deb atagan va unga qat’iy qarshilik ko‘rsatgan.

Biz g‘alaba qozondik, va bugungi kunda uning haykali Varshavada AQSh elchixonasi qarshisida turibdi.

Janob Prezident, harbiy va moliyaviy yordam Ukrainani mustaqilligi hamda Yevropa va butun dunyo erkinligi yo‘lida to‘kilgan qon bilan tenglashtirilishi mumkin emas.

Inson hayoti bebaho. Biz – Sovet Rossiyasining kommunistik rejimi ostida sobiq siyosiy mahbuslar bo‘lgan insonlar – o‘z qonini va erkinligini qurbon qilganlarga minnatdorlik bildirishi tabiiy ekanini tushunamiz.

Biz AQShni 1994 yilda imzolangan Budapesht memorandumiga rioya qilishga chaqiramiz. Ushbu memorandum Ukraina yadroviy quroldan voz kechishi evaziga uning chegaralarini himoya qilish bo‘yicha to‘g‘ridan-to‘g‘ri majburiyatlarni belgilaydi.

Bu kafolatlar shartsizdir – hech qayerda bunday yordam oddiy iqtisodiy bitim sifatida ko‘rilishi kerakligi yozilmagan.

Imzo,

Lex Valensa,

sobiq siyosiy mahbus, “Solidarnost” harakati yetakchisi, Polsha Prezidenti