Одамлар оёқлари билан овоз берадилар. Ҳа, ҳа тўғри ўқидингиз, одамлар оёқлари билан овоз беради.

Мен суҳбатлашган кўплаб билимли, дунёқараши кенг бўлган одамларнинг кўпчилиги чет элга кетиш орзуси борлиги ҳақида гапиришади. Қайси давлатга деган саволга жавоблар ҳам тайин.

АҚШ, Канада, Германия, Франция, Финландия, Дания ва бошқа бир қатор эркинлик, демократия деган тушунчалар ривожланган, одамлар ўз фикрларини эркин ва ҳеч кимдан қўрқмай ифода эта оладиган давлатлар биринчилар қаторида туради.

Яъни инсоннинг энг муҳим қадрияти, яъни эркинлик бор жойда яшаш ва ишлаш ҳар қандай эркин фикрли инсон учун муҳим бўлиб бормоқда.

Нисбатан қора меҳнатга, кун ўтиши учун, қорин тўйиши учун ҳаракат қилаётган инсонларнинг аксарияти Россия ва қўшниларимизни маъқул кўради. Оддий қирғиз бозорларида ҳам ўзбек мардикорлари тиқилиб кетган. Лекин бизнинг мардикор бозорларда бирорта қирғизни кўрмагансиз, кўрмайсиз ҳам.

Ҳаммасига мана шу блокнот, ручка, диктант сиёсати сабабчи деб ўйлайман, чунки мана шу одамлар бошқарувнинг қайсидир бўғинида фаолият олиб боради, уларга президент билан учрашиш насиб этди, ўз соҳасида бор муаммоларни улардан яхшироқ ҳеч ким билмайди, ҳатто президент ҳам билмайди. Лекин мана шу имкониятдан фойдаланиб, президентга муаммоларни гапириш, уларга ечим бериш ўрнига ерга қараб диктант ёзишади, керакли пайтда қарсак чалишади.

Чунки жойни йўқотиш, ишни йўқотиш деган қўрқув, эркин бўлиш, ўз фикрини эркин ифода этиш ҳиссиётидан устун келади.

Нетфликс компаниясининг йиллик пул айланмаси 25 млрд доллардан кўп экан, бу Ўзбекистон ялпи ички маҳсулотининг ярмини ташкил қилмоқда. Компания асосчиси Рид Ҳастингнинг сўзларига кўра компания бу даражага фақат озодлик ва масъулият деган маданиятни шакллантириш орқали етиб келган.

Компанияда ҳар қандай одам компания президентининг бирор ишини нотўғри деб ҳисобласа, унинг юзига айтиши керак ва компаниядаги ҳар қандай ходим бошқа ходимга танбеҳ бериш ҳуқуқига эга экан.

Мана шунақа гаплар, қани, ёзамиз, блокнотни очинглар.

Манба: TentakMinds Telegram Kanalı