Ўзбекистонга ҳокимият вакилига қаршилик кўрсатганлик учун жавобгарлик кучайтирилади. Бунга оид қонун лойиҳаси 30 сентябрь куни Сенатнинг ўн тўққизинчи ялпи мажлисида кўриб чиқилган.

Сенаторлар томонидан маъқулланган “Ўзбекистон Республикасининг Жиноят кодексига ҳамда Ўзбекистон Республикасининг Маъмурий жавобгарлик тўғрисидаги кодексига ўзгартишлар киритиш ҳақида”ги қонун билан, юқори палата матбуот хизмати маълумотига кўра, Жиноят кодексининг ҳокимият вакилига ёки фуқаровий бурчини бажараётган шахсга қаршилик кўрсатиш, яъни хизмат вазифасини бажараётган ҳокимият вакилининг қонуний фаолиятига ёки фуқаровий бурчини бажараётган шахсга фаол қаршилик кўрсатиш билан боғлиқ жиноятнинг жазо чоралари кучайтирилмоқда.

Шу билан бирга, Маъмурий жавобгарлик тўғрисидаги кодексга ички ишлар органлари ходими ёки Миллий гвардия ҳарбий хизматчисининг қонуний талабларини бажармаганлик, уларнинг ўз хизмат бурчларини бажаришларига қаршилик кўрсатганлик ва ҳокимият вакилининг қонуний талабларини бажармаслик ёки хизмат вазифаларини бажаришига тўсқинлик қилганлик учун жавобгарликни кучайтиришни назарда тутувчи ўзгартишлар киритиляпти.

“Мамурий жавобгарлик тўғрисидаги кодексда нафақат ички ишлар органлари ходимлари ёки Миллий гвардия ҳарбий хизматчилари (ходимлари), балки бошқа ҳокимият вакилларининг ўз хизмат бурчларини бажаришларига қаршилик кўрсатганлик ёки тўсқинлик қилганлик учун жавобгарликни кучайтириш орқали уларнинг ўз қонуний фаолиятини тўсқинликсиз амалга оширишига шароит яратилади”, дейилган Сенат хабарномасида.

Аввалроқ Озодлик мазкур қонун лойиҳаси Қонунчилик палатаси депутатлари томонидан муҳокама этилгани, у билан Жиноят кодексининг 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш) биринчи қисми санкциясидаги жазо чоралари кучайтирилиши, бунда жарима миқдорини базавий ҳисоблаш миқдорининг эллик бараваридан юз бараваригача ошириш, шунингдек, бир йилдан уч йилгача озодликни чеклаш жазо чорасини киритиш ҳамда озодликдан маҳрум қилиш жазосини бир йилдан уч йилгача кучайтириш назарда тутилгани ҳақида хабарқилганди.

Ҳужжат қонуний кучга кириши учун эндиликда президент томонидан имзоланиши лозим.