Ва хатларнинг қ(х)аттоли бўлиш мумкин
ва умид юқисини артиб ташласа бўлади
ҳатто баҳорнинг рангини ўчиргим келади
юракнинг шаклини ўчиролмайман.

Кўзим имзо қўяр оқшомга ҳар тун
узуун жазирама киприк орасида
бармоғим учига чўккан қуёшни
ўчириб бўлмайди, ўчиролмайман.

Денгизга сўз бериб келганман,
чайқалмайман,
сенга тақлид қилмайман дея
томирга тирмашиб, қалтираб чиққан
титроқларни тўкиб бўлмайди.

Ютина олмайман бўғзимда менинг
наҳанг қилтаноғи туртилиб қолган
ойнинг ёстиғининг остига
чиғаноқ қўйганман синдиролмайман
денгиз сасидаги шиғир-шиғирни
ўчириб бўлмайди,
ўчиролмайман.

25 май 2023 йил.

Гўзал БЕГИМ