Ўзбекистонлик савдогарлар мамлакатга товарларни импорт қилишда хизматидан фойдаланадиган “Абу Сахий” транспорт ширкати фаолияти тўхтаб қолгланидан шикоят қилмоқда.

Озодликнинг аниқлашича, Ўзбекистондаги энг йирик савдо маркази ва товарлар импорти билан шуғулланадиган “Абу Сахий” ширкатининг товарларни қуруқликдан контейнерларда ташиш операциялари Ўзбекистон-Қирғизистон чегарасининг ёпилгани сабаб бўлган. Ширкатнинг авиташувлари тўхтагани йўқ.

Ўзбекистонлик тадбиркорларнинг Озодликка айтишиларича “Абу Сахий” ширкати қарийб уч ҳафтадан бери контейнерлар орқали олиб келинадиган товарларни мижозларга етказиб бера олмаяпти.

“Абу Сахий” каргоси орқали Хитойдан товарлар келмаяпти. Бизга бу ҳақда аниқ жавоб берилмаяпти. Шуга аниқлик киритиб берсангиз”, дейилади Озодликка келган мактубда.

“Абу Сахий” ширкатинин Хитойдаги вакили, Озодлик билан суҳбатда, ҳақиқатан бу мамлакатдан контейнер юкларини Ўзбекистонга олиб ўтиш вақтинча тўхтатилганини тасдиқлади. Ўзини таништирмаган суҳбатдошимиз карго юклари шу ойнинг охирида Ўзбекистондаги манзилга етказилиши кутилмоқда, дея маълум қилди.

“Шу ойнинг охиргача етказилади, Худо хоҳласа. Юклар тўхтаб қолганининг сабаби Қирғизистон билан чегара ёпиб қўйилганидир. Бир ойча бўлиб қолди бунга. Лекин ойнинг охирида чегара очилиб қолади, деб турибмиз”, дейди “Абу Сахий” вакили.

Озодликка маълум бўлишича, “Абу Сахий” логистика ширкатининг фақатгина Хитойдан қуруқлик орқали келтириладиган юклари билан боғлиқ фаолиятигина тўхтаб қолган. Ширкатнинг Тошкентдаги идораси авиаташувлар бўлими вакили бу вазият самолётларда ташиладиган товарларнинг етказилишга таъсир қилгани йўқ, дея билдирди.

“Фақат Хитойдан келадиган контейнерлар тўхтаб қолган. Авиаташувлар давом этмоқда. Товар тўпланиши билан самолётлар қатнаб турибди”, деди “Абу Сахий” ваикли.

“Абу Сахий” Ўзбекистонда логистика ва транспорт хизматларини кўрсатадиган энг йирик ширкат ҳисобланади. Тошкентда йирик савдо маркази бўлган бу компания Ўзбекистон президентининг кенжа қизи Лола Каримова ва унинг турмуш ўртоғи Тимур Тиллаев томонидан назорат қилинишига оид иддаолар бор.

Манба: ozodlik.org